.. عن الـــبووووياات ظاهره انتشرت وبقووه في مجتمعنا الخليجي..
لقاء صحفي جريء ينشر في أحد الصحف اليومية وهو مع بوية....
يتساءل الكثيرون ماذا تفعل البوية وما هو نمط حياتها؟! كيف يتقبلها المجتمع وكيف تتقبل هي نفسها؟! كيف غيرت من طبيعتها وفطرتها التي فطرها الله تعالى بها لتكون فتاة في هيئة رجل؟!
أسئلة كثيرة لا يستطيع الإنسان الطبيعي إجابتها ولكن البوية تستطيع الإجابة عنها لذلك نترككم مع هذا اللقاء الصريح والجريء الذي يحوي الكثير من الاعترافات التي يجهلها الكثير منا....
وبعد قراءتكم له أتمنى رأي كل عضو في هذه الظاهرة الغريبة التي بدأت غزو مجتمعنا....!
*مرتاحة ومقتنعة للوضع اللي انتي فيه كونج ( بوية)؟
- ايه مرتاحة صارلي سنين على هذا الحال.
* خلينا نبدأ من البداية كم كان عمرج أول ما فكرتي بهذا الموضوع؟
- هذا يحتاج التفكير بالموضوع! هذي الشغله صارت من ظروف.. اهو انا مو بقعد مع نفسي واقول انا بصير بوية.. يعني من ظروفي انا من يوم كان عمري 14 سنه بعد ما الوالد والوالدة انفصلوا وتعرف الظروف اهيه اللي تلعب بالشخص وتكون جذي.
· من كان عمرج 14 سنه يعني ما مريتي بإحساس الأنوثة أبدا؟
- لا.. ما حسيت أبدا اني بكلم واحد.
· من أول ما بلغتي وانتي في ميول لنفس الجنس اللي انتي منه؟
- ايه.
· كانت لج تجربه مع أحد؟
- ايه.. مع بنات الجيران.
· وشلون أقنعتيهم؟
- لا ما أقنعتهم عادي إعجاب أو رسايل حب وبعدين صار مع المدرسات.
· أول مدرسه صارت معاها الشغله هذي كم كان عمرج؟
- كنت في الثانوية.
· شلون كانت القصة بينكم؟
- عادي تبادل رسائل وحب وبعدين صار مع المدرسات.
· ابتدت منج والا منها؟
- مني.
· انتي تحاولين بالمدرسة؟
- ايه.. دايم أتحرش انا بالمدرسات المعروفة بالثانوية.
· ماخفتي من المدرسة لأن المدرسة بالأخير لها هيبة؟
- لا لأن دزيت لها رسايل واستانست وعادي كانت متقبله الوضع وصار بيني وبينها علاقة حب 3 سنوات.
· اهي تدرسج؟
- لا ماكانت تدرسني.
· وين كنتوا تتقابلون؟
- عادي كنا نتمشى وبغرفة المدرسات نفسها.
· تختلون مع بعض بالحمام؟
- لا شودينا الحمام.. ( تضحك ).
· يعني كنتوا أحيانا تقعدون مع بعض؟
- لا .. لا بس كنت ماسكه ايدها وبس ومافي تطور أكثر من جذي ماكنت أفكر بأكثر من اني أحبها وماسكه ايدها.
· ما خفتي انه يشكون فيج الطالبات أو المدرسات؟
- لا كانوا يغارون مني.
· الطالبات؟
- ايه.
· ليش؟
- لأنه كانت هالمدرسه تعطيني ويه.
· كانوا يدرون بالموضوع أقصد المدرسات والطالبات؟
- كأصحاب بس وكانوا يدرون انه فيه رسائل بيني وبينها ولا أي شي أكثر.
· شلون انقطعت علاقتج فيها؟
- الظاهر عرفت ان هذا الشي غلط وهي متزوجة وعندها يهال.
· سويتوا شي مع بعض والا مجرد مسك ايد؟
- بس ايد.
· اوكي الحالة الثانية اللي صادفتج؟
- هيه قبل هذه كانت أيام التحرير مع بنت جيرانا كان بينا (............) وبس.
· ابي القصة الثانية اللي أثرت بحياتج غير هذي؟
- يعني بعلاقاتي انا وايد صارت لي علاقات مع البنات بس أيام دراستي بالكلية كانت لي علاقة حب مع وحدة بعدين تعرفت على ثانية وثالثة ورابعة وخامسة وعد وخربط بنات وغير العلاقات العابرة يعني.
· جم وحدة دشت بحياتج؟
- فوق الخمسين.
· من أول شكلج جذي والا تطور؟
- لا تطور.
· متى صار شكلج جذي وخلاص اعترفتي انج بوية؟
- يمكن من عام 1996 م.
· الأهل شلون تقبلوا الموضوع؟
- عادي مافي مشاكل محد يحاسبني على شكلي ولا شعري.
· يعني اخوانج امج ابوج مالهم دور بالموضوع وهم يشوفون بنتهم بوية؟
- لا اهم ما يدرون اني بويه بس يشوفون ان ملابسي رجالية وقصة شعري.
· في تفكك أسري في أسرتك؟
- ايه أكيد.
· علاقتج مع خواتج فيها نوع من الحدود؟
- لا لا لا بالعكس.
· يغارون عليج؟
- فيه خواتي الصغار.
· اللي مافهموا للحين؟
- ايه..
· يعاملونج على انج بنية ويغارون عليج؟
- ايه أكيد..
· خلونا نتكلم عن علاقاتكم انتو البنات شلون تصيدونهم؟
- عادي.. في أماكن منتزهات نروح لها وادري انه المكان هذا مكان الليديات اللي يبون بويات.
· مثل؟!
- لا ما أقدر أقولك...
· تخافين يمسكونهم يعني؟
- ايه أكيد يكفي انه الأهل إذا عرفوا ان المكان فيه بويات ما يخلون بناتهم يروحون.
· فيه إشارة معينة تعرفين انه البنية هذي ليدي؟
- يكفي انها تطالعني أو انها تسوي حركات انها تبيني، وايد تصير معاي جذي بس آنا ما أعطي ويه.
· من اللي يتحرش بالثاني انتي والا اهم؟
- من الصوبين يعني ساعات أحس من نظرتها تبيني.تبي تحاجيني وساعات لا أنا ألحقها يعني أحاول فيها لين تاخذ الرقم.
· يعني نفس ما يرقمون الشباب؟
- ايه نفسهم.
· انزين اللي تحبينها الحين بحياتج شلون تعرفتي عليها؟
- تعرفت عليها في منتزه معين بس حاولت فيها يعني تبي تتسلى معاي، يعني مو مفكره بعلاقة تبي تتسلى وبعدين حبتني مع انها صغيرة.
· أول تجربة لها انتي؟
- لا.
· متعرفة على بوية اهيه قبلج؟
- ايه متعرفة على وايد بس كانت قاعدة تلعب لأنها تحب تلعب على البويات.
· والحين استمرت معاج وبينكم علاقة حب؟
- ايه أكيد أحبها وتحبني..
· حب اللي اهو بين رجل وامرأة؟
- ايه بالضبط.
· في غيرة بينكم؟
- ايه وايد.
· تطقينها؟
- ايه ثلاث مرات( تبتسم)..
· ليش؟
- يعني شغلة صارت وعشان جذي طقيتها، وما أطقها من هوى لازم تكون غلطانة.
· خلينا نعرف اللي صار؟
- يعني حاولت تحاجي واحد عشان جذي طقيتها.
· تطقينها طراقات والا ترفس؟
- طراقات وماعندي غير الطراقات واكمشها من شعرها.
· واهي ما تدافع عن نفسها؟
- بلى، تمد ايدها.
· من الأقوى؟
- أنا..
· انتو تسوون حفلات بينكم؟
- ايه أكيد في حفلات.
· كم عدد البويات اللي بالديره ؟
- فوق 150 و200 وحدة.
· تعرفون بعضكم؟
- ايه أكيد.
· في حياتج فكرتي انج تحاجين جنس ثالث؟
- ايه.
· شلون؟
- ما أدري ممكن اهم لهم حياتهم ولنا حياتنا بس انا ما اعرف مكانهم يعني مثل ما اهم ما يعرفون اماكنا احنا ما نعرف أماكنهم ومو كثير أشوفهم وان شفتهم تلقاني انبهر اقعد أطالع واستغرب مثل ما اهمه ممكن يستغربون من أشكالنا بس أكيد اهم لهم جوهم وأماكنهم وحفلاتهم.
· بس ماجربتي انج تتعرفين على جنس؟
- بلى مرة رقمت واحد جنة بنية معقدة بالشكل بالشعر باللبس.
· صار بينكم علاقة؟
- لا عادي عطيته رقمي وخذاه واستغربت انه دق وحاجيته وفجأة جان يرد علي واحد قلت أبي شيخه اسمه شيخه جان يقولي اوكي الحين تحاجيج خمس دقايق وتدق عليك فدقت واستغربت جان تقول هذا حبيبي قلت انزين عادي احاجيج جان تقول ايه عادي فاهنيه خلاص ما قمت أدق لأنه خلاص عندها حبيبها ومابي أخرب عليها.
· جم عمرج الحين؟
- اثنين وثلاثين سنة.
· تحبين اليهال؟
- وايد..
· تتمنين يكون لج طفل؟
- ولد أختي اهو ولدي.
· مقتنعة بجذي؟
- ايه مقتنعة.
· لكنه هذا مو ولدج؟
- بس اعتبره ولدي.
· ما يصير تعتبرينه لأنه مو طالع من بطنج؟
- مايخالف بس آنا اللي انومه انظفه اشربه ينام عندي بعد، وانا اللي اطلب من اختي جذي..
· تتمنين يكون لج طفل من بطنج انتي؟
- لا..
· وان صار عمرج خمسين مثلا؟
- عادي.
· خلج بالإجابة اللي تقولينها صريحة لانه إذا صار عمرج خمسين أو ستين سنة انتهى شي اسمه البوية بالنسبة لج لانه محد راح يطالعج؟
- عادي.. ما أفكر الحين اني أتزوج ويصير عندي يهال.
· يعني ما فكرتي بالمرحلة هذي؟
- لا.
· ليش ما فكرتي؟ ماراح تعيشينها يعني؟!
- لا راح تييني بس انا عايشة حياتي..
· شتسوين اذا صرتي عيوز هل راح تنتحرين مثلا؟
- يكفي انه انا مقتنعة بالشي هذا.
· اوكي عشتي مرحله من مراحل حياتج بس الحياة مراحل في مرحلة اسمها الشباب؟
- ايه ما يخالف عادي..
· ساعتها شبتسوين؟
- ليش راح أموت؟
· عيل شلون بتعيشين؟
- عادي.
· تخيلي ان الشي اللي تضحين عشانه انتهى وهو انج تكونين بويه وتمارسين مع البنات؟
- هذا مرض.
· انتهى هذا مرض والا مو مرض انتهى؟
- ايه ما يخالف هذا مرض فيني انا مقتنعة انه انا أكون بويه.
· ما راح تندمين انه عمرج ستين سنة وما عندج طفل؟
- لا.
· وين بيقطونج دار العجزة؟
- لا من ياب طاري دار العجزة!
· من اللي يشيل كبرتج؟
- عادي قاعدة في بيتنا معززة مكرمة.
· إذا صار عمركم ستين سنة كم واحد اهو يبي اللي يشيله؟
- اوكي مقتنعة اني عايشه حياتي بالبيت والا برا البيت عايشه بروحي اوكي مافي مشاكل عندي.
· أنا أقصد انه إنسانة بروحها ما عندها إلا إخوانها كبروا بالأخير وين تكون إذا ما عندها أحد ما عندها يهال ولا زوج وين راح تروح ولا تقولين بالبيت لأن البيت منو راح يعتني فيج؟
- اوكي ممكن الحين انت تسولف اطلع منك وأموت ماكو مشاكل.
· هذا إذا تموتين في شبابج أنا أقصد المرحلة إذا عشت بعد الستين للثمانين عشرين سنة عندج تقعدينها بدار العجزة؟
- اوكي عادي دار المسنين ماكو مشاكل عندي بس انا مقتنعة انه انا جذي.
· ماراح تحسين بالندم ساعتها وتذكرين هذا اللقاء الصحفي؟
- لا ما أحس بالندم.
· انزين توعديني انج تفكرين فيه الليلة؟
- لا مو محتاجة.
· ما تحسين انج مغمضة عن الحقيقة؟
- لا.
· تحاولين تتناسين مو راضية تطالعين لي جدام شوية وتعيشين يومج بس؟
- اوكي قاعدة أعيش يومي وأفكر بالمستقبل بس أفكر انه اوكي
شنو مستقبلج اللي قاعدة ترسمينه؟
- ما عندي مستقبل كثر ما انا اوكي عايشه حياتي عندي حبيبتي وأدري انه كل علاقة من هالنوع راح تنتهي والحياة مستمرة.
· معنى كلامج انه ما عندج أي تخطيط لمستقبلج؟
- لا ما عندي.
· لو كل واحد فكر مثل طريقتج ما صار فيه الدنيا أصلاً؟
- لا مقتنعة بكل شي قاعدة أسويه.
· مو جنج مريضة؟
- ايه كل البويات مريضين.
· شنو المرض اللي فيكم؟
- مرض نفسي أكيد في حياتهم معاناة اهي اللي خلتهم جذي.
· ما رحتي لطبيب نفسي؟
- لا.
· لأنج انت ما تبين تتشافين؟
- لا مقتنعة باللي قاعدة أسويه أدري غلط بس مقتنعة لانه كنت مارة بمعاناة أبوي عن أمي وهذا اللي صار.
· هل كل واحد انفصل أبوه وأمه ينحرف عن الشيء اللي الله خلقه عشانه؟
- أكيد وايد انحرافات.
· طيب نص أهل الكويت مروا بخلافات زوجية وجذي تعتقدين كلهم بينحرفون أولادهم هذا معقول يعني؟
- أكيد بينحرفون، مخدرات من ناحية الشباب، ومن ناحية البنات تمشي بطريج الغلط... تكلم الشباب مثلاً يمكن تمشي مشي ثاني أكثر انحراف.
· يمكن هذا أهون بس انت الحين عكس الطبيعة اللي خلقج الله عشانها؟
- شكلي؟
· حياتج كلها مو بس شكلج.. الله خلقج بنت وانتي سويتي نفسك ولد؟
- بلاء من ربي.
· تقولين بلاء من ربج الله عز وجل يبتلي الناس كلهم، منهم اللي يبتليه يكون أعمى واللي يبتليه يكون ما عنده فلوس وكل واحد يبتليه بطريقة هل معنى هذا انه كل واحد يبتليه يفشل.. عيل احنا ما نستحق الجنة؟
- بس بالأخير هذا بلاء.. عيل شتسميه؟
· ليش ما تصبرين عليه؟
- شلون أصبر عليه؟
· تواجهينه؟
انا من صغري جذي.
· بس انتي الحين كبرتي أنا قاعد احاجي وحدة عاقله قاعدة تفهم شقاعدة تقول وتفكر وتعرف مثل ما يقولون التمرة من الجمرة فليش مو الحين تفكرين انتي الحين صار عمرج 32 يعني قمة العقل.
- انت تكلم وحدة صار لها سنين خلاص ما تقدر تعدل فيها.
· انزين أسألج سؤال أنتي تصلين؟
- ايه وأفكر أروح العمرة بعد.
· تدرين شنو عقوبة المتشبهات بالرجال من النساء؟
- ايه أدري.
· تعرفين أنها النار؟
- أدري انا ما قلتلك انا صح!!
· تعرفين انه النبي صلى الله عليه وسلم قال " لعن الله المتشبهات بالرجال من النساء" ؟
- قلتلك ان هذا غلط وهذا ابتلاء ومرض.
· تحملي صراحتي؟
- لا بالعكس اللي قاعد تقوله صح انا ما قلتلك انه انا أفتخر اني بوية ولا قلتلك انه لنا حقوق احنا يا البويات ولا قلتلك اني أطالب بالشيء الفلاني بس قاعدة أقولك أن هذا مرض كل بوية مريضة نفسية.
· تخافين من الله؟
- ايه أكيد.
· تدرين انه انت في قمة الانحراف الإنساني؟
- أدري.
· تخيلي كلمتي " في قمة الانحراف الإنساني"؟
- اوكي مقتنعة قاعدة أقولك انه انا غلطانة وهذا ابتلاء ومرض نفسي.
· أنا قاعد أحاجيج أنتي يا ( س) من الناس ليش ما تصلحين نفسج، انتي قاعدة تصلين وتعرفين فيه موت ممكن تموتين اليوم أو باجر وفي يوم راح تلقين الله عز وجل شراح تقوليله؟
- اوكي انا متذكرة وعارفة بغلطي بس ما تيي تحاسبني!!
· والحل؟
- الحل تخليه جذي مو انت اللي تييي تقولي سوي جذي..
· عذر عند الله اني أعرف انه انا غلطان؟!
- اوكي انت عليك انك نصحتني وسمعت النصيحة أو ما سمعتها حق نفسي.
· هذا لقاء صحفي انا ما أبي اصلحج ولا أفسدج الشغله اقتناع وكيفج.
- اوكي أصلي وأتمنى أروح العمرة قبل أحط راسي عالمخدة قبل لا أنام اقرأ شوية آيات وبعدين أنام.
· تخافين من الموت؟
- أتوقع انه ايي بأي لحظة عادي بس مو سالفة انه أخاف لانه معروف كل إنسان راح يموت.
· بس ما تخافين تموتين وانت على هالحالة هذي؟
- عادي.
· شرايج نسوي تجربة وخلج صريحة فيها انا بقولج انه يا تنحرمين من حبيبتج للأبد من غير حتى وداع يا انه تمسكين ولاعة وتحطينها تحت إيدج خمس دقايق، أيهما تختارين بكل أمانة؟
- أختار وداعها ( ابتسامة).
· هذا اللي أبي أوصله يعني خمس دقايق ما تحملتي النار واهي ولاعة شلون بتحملين نار جهنم؟
- بس قاعدة أقولك مقتنعة باللي قاعدة أسويه انه غلط.
· ما يكفي، اقتناعج هذا ما راح يخليج تدشين النار؟
- اوكي أدري ان راح أدش النار بهالشي اللي قاعدة أسويه.
· شلون تقولين مقتنعة أدش النار وانتي ولاعة مو قادرة تتحملين معاناتها، أنتي مصدقة والا مو مصدقة انه في شي اسمه نار جهنم؟
- ايه أدري انه في شي اسمه نار جهنم و أدري انه انا راح أدش النار.
· شلون يعني انج قادرة تتحملين نار جهنم ومو قادرة تتحملين نار الولاعة؟
- هذي نار وهذي نار.
· بس قاعد أقولج هذيج نار جهنم على كبرها وراح تحرق جسمج كله وهذي ولاعة وخمس دقايق بس وهذيج ممكن تقعدين فيها ألف ألفين سنة.. الله أعلم؟
- في الحالتين انه هذي نار وهذي نار.
· لا في الحالتين انه أنتي بهذي مقتنعة لأنج تشوفينها جدامج الولاعة، أما نار جهنم شي سمعتي عنه مو مقتنعة تماماً فأنا أقولج انه هاللي تشوفينه جدامج يتضاعف ألف ألف مرة عن اللي يوم القيامة انا ما أحاول أصلحج انا قاعد أقولج شي عشان القراء يعرفون بهاللقاء هذا اني كل اللي أتمناه اني اصحيج من النوم لأن انتي نايمة تماماً مخدرة من الشيطان زين، أنتي مخدرة والله العظيم الشيطان معطيج إبرة مخدرة فيها تشوفين الجانب الحسن بالعلاقة ( إني أنا مستانسة وجذي) لكن أنتي مو قاعدة تشوفين بالعين الثانية.
- اوكي وايد كلموني ووايد نصحوني من رفيجاتي.
· فكري بالكلام اللي قلته لج قبل لا تندمين..
- ما راح أقتنع فيه.
· أنتي لا تقتنعين لكن فكري فيه.
- اوكي انا قاعدة أقولك انا ماشية حياتي ياما نصحوني.
· هذا ما يكفي..
- أنت ما تيي تحاسبني!!
· انا ما أحاسبج لكن ما يكفي ان أعترف انه غلط عشان أبرر لنفسي، هذا ما يكفي، لا يكفي عن الله انه بيغفر لج ولا يكفي عند الناس انهم يقولون خلاص. من يكفي عنده عندج أنتي عند الشيطان اهو الآن مخدرج لكن عند الناس ما يكفي وقبلهم عند الله ما يكفي شالفايدة من اعترافج؟
- شوف خلني أقولك الحين انا من يوم كنت صغيرة ما ييت وقلت أنا لازم أصير بوية الشي صار على مراحل لين صرت بالوضع اللي أنا فيه بس لما تيي وحدة عمرها 17 أو 18 سنة اتييك تقولك انا بصير بوية اهي تبي تصير تبي تجرب بس انا طلعت من هالشي هذا من معاناة.
· ليش ما تتوبين؟
- قاعدة أقولك أدري انه غلط بس ما أقدر. أنت ما تيي تصلح شي صار له سنين.
· يعني اللي اخترب خلاص يموت ويظل خربان عيل ليش باب التوبة مفتوح لما يموت الواحد؟
- اوكي انا عندي عقل وماني صغيرة وأدري انه هذا غلط يعني إذا تبي تصلحني قطني بالطب النفسي..
· أنتي روحي للطب النفسي مو انا اللي أقطج..
- أنت تبي أتشافى صح؟!
· لا تروحين طبيب نفسي عالجي نفسج أنتي بنفسج طالما عرفتي انج غلط طالما عرفتي انه في شي اسمه عيب عند المجتمع وعرفتي انه في شي اسمه حرام عند الله عز وجل خلاص أصير بنية حالي حال الناس وأتزوج ويصير عندي يهال ويصير عندي بيت وأمارس حياتي بطبيعتها؟
- ما أقدر..
· ما تعتقدين الشيطان اهو اللي قاعد يرد؟
- ليش الشيطان يرد!!
· متأكدة هذي إجابتج أنتي؟
- ايه..
· في بويات تابوا؟
- ما شفت. من اللي أعرفهم ما شفت ممكن تطول شعرها لكن اهي من داخلها بوية.
· لا أقصد وحدة تابت وخلاص ندمت على اللي سوته؟
- يمكن وحدة ثنتين لكن انا ما أعرفهم يمكن بس وايد ماشين بالطريج هذا.
· وفي نهاية اللقاء شنو تحبين تقولين؟
- أقول لكل أسرة تحب اعيالها وتخاف عليهم.. ولكل أب وأم ديروا بالكم على اعيالكم وراقبوهم واهتموا فيهم ولا تقصرون معاهم.. ترى وجود الأم والأب في حياة البنت والولد ضرورية أنا كنت محتاجة أبوي أكثر من أمي وللحين أحتاجه مع أنه بعيد عني وأحسد كل بنت لمن أشوفها بالسوق أو الجمعية تنادي أبوها أو تاخذ رأيه بشيء أنا وايد أفقد حنان الأبوة وكنت أتمنى لو أني عشت مع أبوي وأمي ماكان حالي جذي.
يا الله ما هذا الفساد الذي حل بالمجتمع!.. كثير منا يقف عند هذا اللقاء ليعرف مدى الانحراف الذي وصل إليه المجتمع.. " لعن الله المتشبهات بالرجال من النساء" ولكن ما من معتبر؟! لا أحد يرى هذه الكلمات بعين اليقين ليرى ما تحمله من معاني.. لو أمعن الإنسان النظر بآيات الله عز وجل وبأحاديث النبي صلى الله عليه وسلم لتعلم منها الكثير من المعاني وسوف يعلم أن رحمة الله تعالى واسعة....
ولكن تظل طبيعة الإنسان هي الركض خلف ملهيات الحياة الدنيا ليشبع رغباته...
تضيع الكلمات من أفواهنا... نود لو استطعنا أن نغير العالم إلى الأفضل ولكن.......!
لا يسعنا سوى الدعاء بأن يغفر الله ذنوبنا ويرحمنا بواسع رحمته ولا يجعلنا من الذين كفروا وندعو بأن يهدي المسلمين ويغفر ذنوبهم ... آمييين.....
احنا وايد تكلمنا عن أسباب هذي الظاهرة في مجتمعاتنا ..و ندري منشأها من وين
بس هالمرة نبي حلـــــول ..ما يصير ندفن راسنا بالرمـــــل ونقول ما عندنا شــــــــي .........
شراااايكم !!!!!
تحيـــــــــــــــــــــــــــ
روحـــــــــــ ــــــــاتـــــــــــــي 
(لقاء مع بويه)<< مسترجله 
روح
العرض العادي
