عاد عيد الصاحب اللي غثنـا بفراقـه=كيف اسير بوسط ظلما غبت يافانوسـه
كان ابن غسلان روحه في دياره ضاقه=اشهد انه راس عز يستحـق البوسـه
ياخويي لك خويـآ ماتشيـن اخلاقـه=مايرز النفس لو غيـره تـرز نفوسـه
ماجد العلوان حرك نفسـي المشتاقـه=للحروف اللي على نفس البحر مقيوسه
انت يافواز تنعـش حبرهـا واوراقـه=كيف ابنسى شعرك اللي حافظين دروسه
كان راوي نجد يشكي من عشير باقـه=قبل راوي نجد قلبي ذاق طعنت موسـه
كاتم بالروح نـارآ تشتعـل باشناقـه=تشعله نار المحبه مع هروج نجوسـه
نار هجران الحبايب تصطلي باعماقـه=وهرجة العذال صارت بالضماير سوسه
كل ماداويت قلبي مـن جـروح ذاقـه=تجرحه ذكرى عنودآ بالحشى مغروسه
اكتفيت بعشر عفوآ مابقالي طاقه =ياخليل العصر ساس الشعر ياقاموسـه

مـابــقــى لـلــصــبـر فـي روحـي جلاده=فـي غـيـاب الـلـي بهجـرانـه حـرقـها
الـســهـــر لـلــعــــيـــن يـاعـــواد عــــاده=في بـحـور الـسـهـر من ربـي خـلـقـها
بـس اشـــوف الــنـــار يـاعــواد زاده=من هـجوس(ن)بالحشى يقدح فشقها
هـجـر مـحـبوب الحشى يقدح زناده=راح عـمـري يـشـتـكي ظـلـمـة نـفـقـهـا
هـاجـس(ن)يـمـنـع عـيوني من رقاده=عـقـب عـيـن اللـي معـالـيـقـي سرقها
والـلـه ان الـروح تـشـكـي من قـياده=اوجس ان الـروح فـي تـالـي رمـقـها
عـيـنـهـا عـيـن اشـقـر(ن)بـاول هداده=يـمـزر عـروق الـحـبـاري لا صفـقـها
مع طـلـوع الـشـمـس لاذعــذع براده=والـغـصـون من الـهـواء يـومـي ورقها
كل صـيـد الــروض بالـمـقـناص صاده=يـايـشـيـل عـروقـهــا والا خـنـــقــهـا
فوق كـف الـشيـخ بـه ثــقـل وركاده=وان لـمـح صـيـد الـخـلا فـز ولـحـقـها
مادخـل مـجـلــوب لـلـســوق ومــزاده=والــطــيــور بـطــيــبـهـا ربــي فـرقـهـا
والرموش ان سـلـهـمت يسحر سواده=كم خفوق(ن)طاح من نظرة حدقها
ريــحـهـا ريـح الـبـخـتـري فـي حـمـاده=والـمـطـر فـي تـالـي الوسـمي رشقـها
تقل زرع(ن)ساكب(ن)يرجي حصاده=راحـــة الــمـهــمـوم لاداج بـشـنــقـهـا

من يلومك وانت متوسد كتاده=وعشقتك بالويل ترمي من عشقها

انت ماجابك لها غير القراده=وابو صالح للشماته مانطقها

دام انا وياك خشره بالنكاده=اشتركنا في لحمها وفي مرقها


كل ماقلت آآه من هجران غاده=ان زفرها واحد الاخر شهقها

كيف يسعد فاقد اسباب السعاده=والتواصل كل بيبانه غلقها

الهنا لافات مافيه استعاده=جمرة الحرمان يافواز ذقها

لاجل تحسد مثلي اصحاب البلاده=واحمل المحمول واسهر وسط مقها



من يقول النوم للظالم عباده=مالي الا اقول درجها وسقها

الهوى عجز قويين الاراده=يوم قفت كنها عميا وصقها

واعنى فواز من حرب الاباده=والعدو كل القوانين اخترقها

دمرت شعبه ونفطه واقتصاده=مثل قوله روحه بتالي رمقها

ياابو فهد ياعزوتي آسف على طول الغياب=الحال خافي وانت تدريبه ولاهو في يدي
الشاهد الله ماعلى مثلي ملام ولاعتاب=ماني مبرر غلطتي لاصرت تفهم مقصدي
الصمت والكتمان للمبلي مثل ستر الثياب=اليا كسبنا الستر هانت كل بلوى يابعدي
ماني على خبرك ترى الكابتن بعد خبرك مصاب=واصابتي غظروف بالركبه وانا حظي ردي
خذ موجز الاحوال والتقرير من فحوى الخطاب=وانا اعرف سهيل اليماني مايغار من الجدي
اببتدي بالفهرسه من قبل مضمون الكتاب=وابفرض انك قلت وش بك عكس غيرك تبتدي
هذا السؤال اللي طرح نفسه ويبحث عن جواب=والله يصبرني على بلواي لاضاع جهدي
انا العليل اللي علاجه بين جنحان الغراب=واليا اقتربت يطير بالجنحان واخوك يعدي
ياصاحبي ياصاحبي وش هو علاج الاكتئاب=لاطاول الرجال تسع شهور واصبح سرمدي
واسباب ماجاني سهوم عيون لباس النقاب=الله يسامحها وانا باسبابها متعقدي
يافاتنه خوفي من الله لاتزيديني عذاب=وشلون عينك تسهر عيون العباد وترقدي
وش تبين اكثر من اللي شفت يامال الذ هاب=يالعنبو حي العدو روفي بحال الاجودي
يالله عسى اللي صابني تكفير في يوم الحساب=ياكبرها ياعبرها آسم ذلولي وتغدي
مليار نكبه ماضيه هذا وانا توي شباب=وقف رصيد امسي ويومي وقافيهن غدي
ياراويتنا المحترم وش هي شروط الانسحاب=ابنسحب من حبها وانظر لبنتي وولدي
ابشر ترى اللي نفس الكربه عن المسلم يثاب=يرفع يدينه بالدعا ويعيدها بالمسجدي
التوريه ياابو فهد في جو معنانا ضباب=لاصرت نجم (ن)بالسما حنا بنورك نهتدي

انا حـسـبت الـجـرح الاول فيـك ياعـواد طـاب=عقب الهجوم اللي حدث لك من رموش المعتدي
ظنيت خصمك يابوصالح عن شرور الحرب تاب=وعن شن غـارات الـغـرام الشين واللـيل اسودي
شـفـتـه تـرك كل البيوت بـقـصـف نـيـرانـه خـراب=وصارت مثل بعض الـديار اللي شـمـال المشهدي
وظنيت ابوصالح نسى ركـضـه ورى زول السراب=او يـسـتـمـع تـاريـخ نــجــد الـلـي رواه الـمـرشـدي
واثريك طـايـح ياعشيري عـقـب طـعـنـات الحراب=وهـذا الـذي خــلاك عـنــي يـابـوصـالـح تـلــبـدي
شكيت شيبك للـذي قـبلـك من الـخـفـرات شاب=وقعدت من ضيم الغرام بـنـفـس صـيـغـة مقـعدي
لا تشتكـي جرح الـعـنـايـد قـبـل تـكـمـيـل النصاب=وترى البساط اللي فرشنا صار يالـقـرم احـمـدي
مـمـنـوع تـشـكـي قـبـل تـكـمـل عام ياسمح الجناب=وانـتـه سـهـيـر(ن)بـالـحـمـاد وفوق جـمـر المنـقدي
تـقـعـد لــحـالـك ماتـخـاف الـلـيــل والا زول داب=وترقب بـروق(ن)في ديار الـزيـن نـوره يـصـعدي
وترسل سلامك للـحـبـايـب كـلـمـا لاح الـشـهـاب=تـصير عـيـنـك مـع نـجـوم الـلـيـل مـثـل الـمـرصـدي
وتقضي نهارك في شبـوك الـعـلـب او ذيك الهضاب=يـمـكـن جـحـيـمـك يابـوصـالـح بالـضـمـاير يسمدي
واصبر مدامك طعت نـجـوى فـي لـحونه مع رباب=وتابع بـرامـج شـيـخـنـا عـبـدالـعــزيــز الـمـسـنـدي
شكيت ناب لواحد(ن)يشكي وجـع عـشـريـن نـاب=رقـيـت جــلــديـه وهـو قـبـلــك بـراس ابـا عــدي

سلام الله وماشاء الله على اللي طاح مجـدوله=شعر ضافـي للاردافـي غـدى زاف(ن)عـلــى زافـي
ابـي عــواد كــانـه فــاد مـايـرتــاد بـنـــزولــه=اخـاف الـصـاد لـلـقـصـاد تـصـبـح ضـاد مـع كافـي
انا عـسـاف غـلـق الـقـاف مهما طاف مفـعـوله=اصيد الحرف واغرف غرف واصرف دون صرافي
وانا محتاج صرف علاج عقب احراج مرسوله=ابـي تـعـمـيــم سـيــن وجـيــم ياصـل كـل الاطـرافي
اريد وصوف راع الجوف عقب الباب وقـفـوله=شـبـيــه الـبــدر زيـن الـصدر مـثل الجوهر الصافي
رمـى حـالـي بـلا والـي ولا لـي قـول مع قـوله=وغـدى روحـي وذابوحـي وانا اكـتـم جـرحي الخافي
رموشه سود وريحه عود ذاق الكود من حـوله=قـوي الـباس فـيـه احـتـاس وامـسـى نـورهــم طـافي
دعـى الخلاق لا يـنـعـاق عـقب الهول من زوله=غـدى الـخـفـاق وسـط اشـواق مـاتـنـطــاق ياكـافـي
رفعت الصوت قبل الفوت خفت الموت وخيوله=لزمـت الصمـت مـا قـاومــت رمـش اريـام الاريافـي
جـحـيـم الشوق ساقن سوق قـبل البوق ومحوله=اخاف السيف عقب الريف واهـل الحـيـف تـنـخـافي
واذا عـواد كالـمـعــتــاد صـاد الـقـاف وحـلـولـه=يـجـي هــداد كـالـجــلاد فــيـــه عــنــاد وخــلافـي

بدا المسجوع عذب النوع والمفجوع قولوله=انا بجنبه مثل ذنبه نديم عاشر سنافي
ترى البيبان ياذيبان مفتوحه ومقفوله=خذاك الوقت وانا اشتقت اذوق المنهل الصافي
لاجل سلمى تشوف المى يفيض القسم بسيوله=اجي كلي ولا ازلي ولاانسى وقفت الوافي
عليك اسلوب بالمكتوب ياصعبه وياطوله=وانا مقرود احب الكود واعشق خير الاصنافي
على خلك تجي كلك لاابو عينين مكحوله=وانا ادلك مودآ لك اجيك اركض وانا حافي
عساه تطيع قبل يضيع مجنونه ومهبوله=ولاتقفي وانا شفي احقق عدل وانصافي
حلاوتها بقساوتها ولاتياتيك بسهوله=ابخربها وابخطبها واجيك بعلمي الشافي
انا عندك ومن جندك انا جوله ولك جوله=نهايتها وبدايتها محبة زين الاوصافي
ختم فواز بالالغاز وانا اقوله واباطوله=انا منحاز والانجاز تصادم قافك بقافي

عــاد عــواد الـطـنـايا=مـثـل شـيـال الـمـنـايا
مسكـنـه بـيـن الحـنـايا=بيـنـنـا عـيـش وصداقه
مرحـبـا بك يابوصالح=لو شرابك صار مالح
الـعرب صارت مـصالح=لاعــهــود ولا لـبـاقـه
النسب ولد الضياغـم=واللـغـم بالصـدر لاغـم
والـنـــغـم لاصـار نـاغـم=هو سبـب كـثـرة فلاقه
يحسب ان الحب رايع=كبسة(ن)والبطن جايع
وطاح كل الـعـقل ضايع=وعايق الغسلان عاقه
قلت لـه خـل الـعذارى=اودعت غيرك سكارى
حـكـمهن حكـم النـصارى=يوم طـبوا فـي عراقه
قال رايك راي حاسد=في دروب العشق كاسد
وانت يالغسلان فاسد=دايـم(ن)عـيـنـك لساقه
قـلـت ياعـواد طـعـني=والـهـوى قبـلـك قـطـعـنـي
والنجـوم اللي سطـعـني=حاست عقول الرفاقه
عـقـب ماذاق الـتـجارب=الهوى لـسع العقارب
كــنهـا نـــفـض الكــهـارب=يوم راع الـزيـن باقـه
وصار طول الليل راغي=يشتكي كسر البراغي
عــقـب ماعـواد طـاغي=كـيـف عـذبـنـي شهاقه
قـال محـبـوبـي مـغادر=شف دمـوع الـعـيـن حادر
زيــنــهــا ياخــوك نـادر=ومالـنـا بالــهـجــر طـاقه
والله ان الـزيـن غـالـي=لو غـرامـه سـم حـالـي
عـفـت كل الناس جالي=كان صـمـم فـي فـراقـه
ساحر(ن)عقلي وروحي=لين بانت بي جروحي
لـو مـعـالـــيــقـي تـــفـوحــي=مانــفــكـر فـي طــلاقـه
قلت تـسـتـاهل عذابك=ياملا الـغـاضـر شبابك
بالمـحـبـه ويـش جـابـك=قال ابي اجرب مذاقه

ابشر ان اخوك جالك=توي اشاهد مقالك
ياعسى الخايب فدالك=جاك ردي في رواقه
يارفيق الدرب هذي=من هواها يستعاذي
ياحزامي ياملاذي=منك يازين الطفاقه
يامعزي يامواسي =عن هوى اللي راح ناسي
انت يالراوي سياسي=يابعد راع الحماقه
القلم حبره يجفي=قبل ماالحق فيك شفي
دايمآ واقف بصفي=كل مادنياي ضاقه
انت يامقدر ظروفي=انت يابهجة حروفي
واحد وتسوى الوفي=ياشهامه ياطلاقه
انت ياعلك بعدها=ياغناة اللي فقدها
كبدي غيابه لهدها=شوفته صارت شفاقه
ليه غبتي يالئيمه =يابعد هند وحليمه
وانتي غيابك جريمه=يمكن يسبب اعاقه
ناوي بفواز نيه=ودي ارسله هديه
واذكر عزومه قويه=دايمآ يكسب سباقه