[ ديوان توأم الماء / فهد المساعد ]

#1 (**permalink**) 08-17-2009, 06:36 PM

مسـآإء / صبآإح

[الخـير / والسعآإده ]

شعـري لهذا اليــوٍم { متفرد اً بـ عـألـم الجمـأل والعذوبـه ولانسانيه }
الشعر الفـذ / فهــد المسـأع ـد

كـل الشكـر : لمن سيتابـع

08-17-2009, 06:50 PM

[ الاسـرٍارَ ]

يا رفيف الماء .. وفجر العيـد .. وأحـزان الموانـي
يا أكثر أهل الأرض طيبـة قلـب .. وأسـرار دفينـه

المكـان اللـي هنـا .. مليـان ضحكـات ، وأغانـي
والكـلام اللـي بغيـت أقـول .. يحتـاج ل سكينـه !

شوفي الركـن البعيـد هنـاك .. كنـه صـدر حانـي
هـذا هـو اللـي يليـق ب شاعـر وبنـت حزينـه!

أنسـي الشـارع ، وعتمـات الزوايـا، والمبـانـي
هاتـي يدينـك نلـف الغـيـم ونشـكـل مديـنـه !!

عنـدي الليلـة كـلام وصمـت .. وأخـاف الثوانـي
تظلمه .. أو تظلـم اللـي فيـه كـم ضاعـت سنينـه

بـس لازم تسمعـيـن الـلـي أبــي ولا تـرانـي
لو ب أعيده لك .. نسيت .. ورحت أقول اللي تبينـه

شي واحد قبل ما أبـدأ .. مـا أبـي أي شـي ثانـي
يخطر ف بالك .. وأنا أكشف لـك شعـور تجهلينـه !

إن أنا .. وبكـل مـا تحملـه " أحبـك" مـن معانـي
كنت،وراح أبقى أحبك .. لين .. مدري وش هو لينه !!

بـس والله ماقـدرت أنسـى .. ولا همـي نسـانـي
لا ذكـرت إنسـان .. فيـه أسـرار مابينـك وبينـه

كـل مـا تطـري علـي فكـرة هــواك الأولانــي
أشعـر إنـي أنطعـن مليـون مـره مـن يديـنـه!

أشعـر إن عيونـك.. الله مـا خلقهـا إلا عشـانـي
كيف كانت تبتسـم لـه؟!.. قولـي إنـك تخدعينـه !!

صورة إنـه كـان يمسـح دمعـك .. تزلـزل كيانـي
وكيف كـان يلـم شعـرك .. ويتبعثـر فـي يمينـه
حتى اسمـك يـوم رحـت أدلله .. حظـي رمانـي..
بنفس الاسم اللي يقول .. بذمتـك ماهـي غبينـه !؟

وكنـي اللـي .. كـل مـا أناديـك بالاسـم الفلانـي
أطلـب النسيـان .. يتـرك منـه شـي تذكرينـه !!

لا تظنينـي أنانـي .. لا .. أنـا مانـيـب أنـانـي
لو سلمت من الغرق . بأمـوت فـي ظهـر السفينـه!

يا إني ما أكمـل وأعانـي .. أو أكمـل ثـم أعانـي..

كل ما اسمع طاري اسمه .. أو تجي عيني في عينـه!
أينا كـان الضحيـه ؟.. وأينـا اللـي كـان جانـي ؟
مـدري !.. ولكـن قـراري لازم إنــك تقبليـنـه:
مثـل مـا أكـره فكـرة إنـه واحـدٍ ياخـذ مكانـي
ما أقدر أجلس في مكـان إنسـان.. كنتـي تعشقينـه!

08-17-2009, 06:53 PM

[ ناس فوق وناس تحت ]

صعب لامنك فشلـت وصعـب لامنـك لقيـت
إن من يكره نجاحك يـدري انـك مـا نجحـت
امس ضقت ورحت اقلـب ذكرياتـي وانتهيـت
عند صورة طفل صوته مثل صوتي لا انجرحت
وش مثل ؟؟ لا والله إلا هذا أنـا يـوم ابتديـت
انطق حروفٍ تلعثـم فـي لسانـي لا انمدحـت
هذا أنا يوم الحيـاه فـنظرتـي عشريـن بيـت
ومسجدين ومدرسه من طين كم فيها اصطبحـت
هذا أنا .. وأصبحت أتمتم .. (هذا أنا) حتى بغيت
اختنق بس القدر عيّـا علـى موتـي وطحـت
وصاح صوت الطفل فيني انت من وين ارتميت
قلت أنا المستقبل اللي فيه كم همـت وطمحـت
امس كنت أبيـك تكبـر بـس والله لـو دريـت
اني اللي عشت لجله مـت عنـدك واسترحـت
لو دريت إن الزمان يجـر رجلـي مـا عديـت
ولو دريت إن البحور بلا موانـي مـا سبحـت
كان دربك لي طويـل وكـل ماشفتـك هويـت
قلت لك كبوة جواد ومـا كبيـت إلا وجمحـت
ليـه تسمعنـي وتمشـي آه ليتـك مامشـيـت
وآه ليتك من كثـر عثـرات الأيـام انتصحـت
ضاعت احلامي وضل الحزن فينـي واهتديـت
للطريق اللـي يودينـي علـى دمعـي ورحـت
يالحزن ليتـك مثـل دمعـي وتنـزل لارقيـت
بس أعرفك لو مسحت الدمع تبقى ما انمسحـت
كان حلمي في وجـود إنسـان يبكـي لابكيـت
وصار حلمي في وجود إنسان يفـرح لافرحـت
كنت اشوف الناس مثلي كل ما جعت وضميـت
ما دريت إن الاوادم ناس فـوق ونـاس تحـت
آآآه يا أول ذكرياتي خذنـي فـحضنـك نسيـت
لأسألك عن وجه ابوي اللي معه يامـا سرحـت
خذني فـحضنك ابغفى .. ياااااه مبطي ماغفيـت
وان لمحت دموع عيني سو نفسـك مـا لمحـت
خذني فـحضنك وبعثر في جروحي وان قضيت
هزلي كتفي وقلي : عيـب تبكـي لـو سمحـت
اضحك وعلم زماني من أنا .. ومن وين جيـت
طق باب الحزن واصرخ فـيّ لامنـي فتحـت
وضمني يمك .. وكمل ضحكتك لامـن بكيـت
ودي اذكر كيف كانت ضحكتي لامـن فرحـت

08-17-2009, 06:55 PM

[ سكـه الذكرى الحزيـنـه ]

مرّني طيفـك .. وطيفـك صاحبـي مـدري عـدوّي
جايبٍ صوتك .. وصوتـك سكـة الذكـرى الحزينـة
قال أنا جوّي تكـدّر .. قلـت : ماهـو كثـر جـوّي
قال فرقانا غبينـة .. قلـت : وأكثـر مـن غبينـة
قال : أنا بأموت من غيبتك قل لـي ويـش أسـوّي؟
قلت : أنا أبغى الموت في غيبتك .. قل لي بس وينه؟!
قبل ترحل .. كنـت أقـول بيسـرح أيـام ويضـوّي
مثـل ماعودنـي اليـا اشتقـت لـه جابـه حنينـه
بـس هالمـرة ثمـان شهـور وضلوعـي تــدوّي
كل يوم أشتاق لك .. يلعـن أبـو الشـوق وسنينـه
كـل ماعشمـت قلبـي .. قـال ياضلوعـي تقـوّي
ورحـت أنـا ويـاه نرقـب رجعـة اللـي فاقدينـه
نوب أقـول اليـا رجـع بكـون فـي قمـة هـدوّي
ونـوب أقـول الا أبزعـل وأتلـى مابينـي وبينـه
كل يوم أجلس علـى جـال البحـر وأقـول تـوّي ..
.. لاسألني : مافقـدت الحلـم فـي لمسـة يدينـه ؟!
مادريـت أن البحـر ماقـال لأمـواجـه تــروّي !
و مادريت أن الغـرق هـو حجّـة غيـاب السفينـة
مادريت .. أو مابغيت أدري .. ولاأدري وش بسوّي
لو رجعت .. وشفت طيفك فـي الممـرات الحزينـة
وين ابنسى وانت طيفـك صاحبـي مـدري عـدوي
مارضى يتـرك لغيـره شبـر واحـد فـي المدينـة!

08-17-2009, 06:57 PM

[ الــي تركـ‘ـني ]

اللي تركني وأنا في عـز غربالـي
بعد الشدايد وش اللي ذكـره فينـي
يبغى زماني يعود ويرجـع الغالـي
وشلون يرجع بعد ماطاح من عيني
لا الوقت وقته ولا له شي في بالـي
أنا نسيتـه مثـل ماكـان ناسينـي
أنا تمنيت نظره منـه فـي حالـي
ياما تمنيـت صوتـه لـو ينادينـي
وأقول لأظلم علـي الليـل بلحالـي
الله يجيبـه يشتـت غربـة سنينـي
من كثر ماكان طيفه دايـم اقبالـي
أحيان أحسه معي وتضمـه ايدينـي
ولامن تنبهت ليـن وجيـه عذالـي
كلٍ علـى ماطـرا بالـه يسمينـي
ليته تركني بعد هـذا علـى فالـي
زي ماتركته بعـد قتلـه بساتينـي
من بعد ماصار جاء بلسانه الحالـي
يبغى يرجّـع زمـانٍ بينـه وبينـي
قولوا له إني ما أحبه كثر ترحالـي
أو لا .. حرام يتضايق وإلا يبكيني؟؟
قولوا له إني أحبه .. بس من تالـي
إن راح وإلا رجع ماعـاد يعنينـي

08-17-2009, 06:59 PM

[ تعـآإل ُ ]

من عز نومي صحيت وشفت في عينـي
دمع تهادى علـى جفنـي وأنـا غافـي
ستـرت دمعـي بكمـي قبـل يغرينـي
وأخذت هذا الجسد مـن باقـي لحافـي
وسريـت تايـه ورا خطـوات رجلينـي
لا الوجه وجهي ولا أوصافي هي أوصافي
أمشـي وأقـول لطريقـي لا توديـنـي
لعيون ناس تبي تـدري عـن الخافـي
أمانتـك.. خلهـا مـا بينـك وبيـنـي
خابرك يالـدرب خـوة عمـر وسنافـي
مـا ودي النـاس تـدري وش يبكينـي
كرامة النفـس ورث أبـوي وأسلافـي
أمشي وأحس الخناجـر فـي شرايينـي
والبرد يمشي وراي وينهـش اطرافـي
وحيـد واللـيـل بـردونـه يغطيـنـي
تقـول كـن البلـد روح بهـا السافـي
إلين ما أوحيـت لـي صـوت ينادينـي
صوت أعرفه مثل ما أجهل وش خلافـي
قمـت أتلفـت وانــادي لا تخليـنـي
ما غيره.. الصوت هذا صوتـه الدافـي
ولمحت زوله من أقصى الـدرب لافينـي
مدري وش اقول لكن حـي هـا اللافـي
تعال.. شف غيبتك كيـف أثـرت فينـي
تعال.. شفني وأنا أغرق عقب مجدافـي
تعال.. خذنـي ورحبـي مـن عناوينـي
تعبت أعدي على جمـرك وأنـا حافـي
تعال واقطف بصوتـك زهـرة سنينـي
كـل المواعيـد عقبـك شمعهـا طافـي
تعـال وازرع خصـل شعـرك بكفينـي
بضمهـا ليـن أحـس بليلـك الظافـي
تعال وشفيـك خايـف؟ أنـت ناسينـي؟
قطعت صوتـي عليـك وطـال ميقافـي
حتى بديت أشعـر أن الحـب معمينـي
وان أنت حلم عثى فينـي وأنـا غافـي
لكن أمانـة تـرى اللـي فـي كافينـي
إن رحت منك كذا مـا رحـت متعافـي
بصـدق الحلـم وأحـذر لا تصحيـنـي
في خاطـري كلمتيـن إن قلتهـا كافـي
أمانة الله عليك إن غبـت عـن عينـي
لا يكون قلبك مثل قلـب الزمـن جافـي
مع كـل دمعـة تذكـر رعشـة يدينـي
ومع كل ضحكـة تذكـر قلبـي الوافـي

08-17-2009, 07:01 PM

[ اخ‘ــرٍ درٍوٍبــي َ ]

يا بشر تكفـون حلّـو عـن سمايـه
ما يصيب الهرج لو الهـرج صوبـي

كـم سكـت لكـم بمـا فيـه الكفايـة
اشتموني لو زعلتـوا واشمتـوا بـي

عيبونـي واتركونـي فـي عمـايـه
واتركوا لي واحـد يرضـى عيوبـي

اتركـوا لـي واحـد يمسـح شقايـه
كل ما حـط الزمـن دوبـه ودوبـي

ذاك والله لآ ذكـرت انـه ورايــه
اشعر إن الكـون كلـه وسـط ثوبـي

يكفـي انـه لـو يسولـف للمرايـه
كن صوته يهمس لصورتـه.. ذوبـي

كيف أنا مـا أذوب مـا دامـه معايـه
اسمعه وأسهر معـه لآخـر دروبـي

كل مـا قـال السهـر درب الغوايـة
قلت كلـه مـن عيونـك هبّلـوا بـي

وكل ما قـال الخطـا ماهـو خطايـه
قلت له قـل للعيـون السـود توبـي

ضيعتـنـي واســأل الله الهـدايـة
وين أجيب العقل.. أجيبه من جيوبـي

من يعرفـك مـا يـدل العقـل رايـة
يا شروق العمر.. مدري يـا غروبـي

أذكر انك كنـت لـي مثـل الهوايـة
لو تروح ولو تجـي يبقـى شحوبـي

بس مدري كيف صرت اليـوم غايـة
وصرت أجي وأروح مدري عن دروبي

يـا بعـد عمـر الكتابـة والقـرايـة
يا الشمالـي يابـو الملـح الجنوبـي

لا قريـت اللـي كتبتـه يـا رجايـه
رح وبلغ ربعـي اللـي جننـوا بـي

قلهـم يمكـن يخـلـون الوشـايـة
و إن تمادوا خلهم مهمـا حكـوا بـي

أنت خلك بـس فـي الدنيـا عزايـه
لا تفكر في العـواذل وأنـت صوبـي

ادري إن كـل درب ولــه نهـايـة
بس أنا باقـي معـك لآخـر دروبـي

08-17-2009, 07:04 PM

[ سحٌ‘ـأبـه ]

جف الكلام ومـدت يدينهـا فـوق : ..
.. أخترت هذي .. وأنت شف لك سحابه
قلت .. ويديني تحتضنها مثل طوق .. :
أختـرت هـذي هـذي أكثـر رحابـه
هذي دفا صوتٍ مـن البـرد مخنـوق
هذي سـؤالٍ نصـف عمـري جوابـه
هذي هي اللي عرّفتني علـى الشـوق
هذي قدر .. ماكنـت حاسـب حسابـه
قطعة حزن في جيب بالـي ومشقـوق
ومضة فرح في عيـون نـاسٍ غلابـه
أن سولفت فـي ثغرهـا لمعـة بـروق
وإن سرّحت في عيونها صمـت غابـه
واليا اضحكت نورٍ من الفجر مسـروق
واليـا بكـت تحـزن عليهـا الكآبـه
حبي لهـا لـوأدري ان فيـه مخلـوق
قدّ حبّ مثلـه .. قلـت : "ياللغرابـه"
هالآدمي من وين له قلـب وعـروق؟!
والصبر هالمسكين مـن ويـن جابـه؟
وأنـا أتكلّـم .. ردّت عيونهـا فـوق
ثم تمتمت : من هي هالأكثـر رحابـه؟؟
قلت ويدينـي تحتضنهـا مثـل طـوق
فـي ذمتـي ماشفـت غيـرك سحابـه

08-17-2009, 07:05 PM

[ الجًـرٍح ]

ياصغيّر السن قدرك طاحت أبراجه
الجرح خلى الصخر ينطق ونطقني
خلاص ماعاد تعنينـي ولا حاجـه
رح جعل ربـي يوفقـك ويوفقنـي
من بعد ما كنت نور العمر وسراجه
اليوم صرت الظلام اللي يطوقنـي
عطيتك أكثر من اللي كنت تحتاجـه
أسرفت فـالحب لين الحب وهقنـي
خلاص مالي ومال الحب وإزعاجه
مالي ومال الدروب اللي تضايقنـي
تعبت أضم البحر واهـدي أمواجـه
تعبت أجامل وأشوف الوقت يسرقني
شكواي للي عليه الضيق وافراجـه
اللي إذا شاء يرحمنـي ويرزقنـي
أما انت يابو جبين عقّـد احجاجـه
لاعاد تسأل علامك منت طايقنـي
الناس كلٍ علـى دربـه ومنهاجـه
وأنا عن الناس مابه شـي يفرقنـي
إلا اني دايم أحب الصدق وأواجـه
مخلوق والله على هالوضع خالقنـي
حتى رفيقي ضماد القلب وعلاجـه
على كثر ما أتمسك فيـه صدقنـي
لو ادري انه مرافقني على حاجـه
لاامسّكه حاجتـه وأقـول فارقنـي

08-17-2009, 07:07 PM

[ تحُ‘ـت الإرٍض احـبـكـُ ]

مي هذي مثل طلّ الصبـح لأغصـان الحدايـق
يبتسـم قطـر النـدى لاباسـتـه أو باسـهـا
مي هذي بنت لامن شفت صدر الليل ضايـق ..
أدري ان عيون مـيّ اليـوم طـال نعاسهـا !
من هنا تصحى ويصحى الحب في عيون الخلايق
ومن هنا تغفى وتنسى الارض ضحكـه ناسهـا
يسعد الله قلب ميّ اللي كثـر ماهـوب بايـق ..
..من قلوب الخلق..مااذكر مـرّ يـوم وداسهـا
لأن مي أرق بنت..ولو قسـت ماهـوب لايـق
حيّرتني مي..الأجمل : هـي..والا أحساسهـا !؟
بالها لاضاق زانت..كيف لامن صـار رايـق!؟
في انتباهتها براءه..كيـف اجـل هوجاسهـا !؟
العمر لو كـان ضحكـه مـي تكفينـي دقايـق
بس اخاف ان مت..تحني مـي فوقـي راسهـا
مي لـو تبكـي لموتـي مالـي الا افـز فايـق
من قبل لاامـوت أكثر..مـن نشيـج انفاسهـا
مي .. لاتعطين بال لمن يقـول المـوت عايـق
الجسـد موتـه يفـك الـروح مـن حراسهـا
ماأحبك فـوق الارض وبـس ياكـل الخلايـق
حتى تحت الارض أحبـك يابعـد مـن داسهـا
مي لو ماقلـت فيهـا بيـت واحـد ماتضايـق
لأن مالي شعـر ينشـر لـو رفـض كراسهـا