صاغ من نبض القلوب المؤمنه عرشـه وتاجـه

خدمـة البيـت الحـرام ورفعـة الإسـلام همّـه

للرزايا كـن وكـر طيـور أبابيـل ف(حجاجـه)

وللعطايـا كـن للطـوفـان بكفـوفـه تتـمّـه

عجل معروف .. متريّث شوف .. وإما عن سراجه

تستدل الشمـس بـه بإشراقهـا وتـروح يمّـه

الشجـاع إللـي يسلّـه سيفـه بيـوم المواجـه

تلبسـه شلفـاه مـن حـور وبواريـده تشمّـه

الكريم أبطا عطـاه لمـن نصـاه وقـال حاجـه

وأنقضت له بعد حـرف الجيـم ماوصّـل لفمّـه

الفطين من إعوجاج السيـف تقويـم إعوجاجـه

راعي العوجا شف بعوجـاه نهضـة كـل الأمّـه

الأمين إللي يخاف إليا رمـش وارجـف رواجـه

خوف لا يسأله رب الخلق عـن عظـم المهمّـه

ويم مايمطـر سحـاب المـدح بكفوفـه نتاجـه

الإمام .. ابن الإمام .. ابن الإمام .. أبـو الأئمّـه

ابطيت كنت انثر احساسي وارد اجمعـه

وانثره ثاني وارد استجمعه مـن جديـد

لين استراحت على غصني طيور اربعـه

الوزن والقاف..والمعنى وروح القصيـد

واخترت لحظة يغط الزعفـران اصبعـه

في القلب ولكل شاعر وقت والشعر صيد

الشعر حرٍ رمى راعيـه عـن برقعـه

واحساسنا ياطويل العمر طلعـن وكيـد

وانا ادري اني بصب الطيب فـي منبعـه

بس الشرف لاتهيت فرصته ليـه احيـد

والناس بالشعـر متبوعـه ومستتبعـه

لكنهـم بالغـلا جولـك علـى ماتريـد

بك يجتمع كـل طيـب وكفـك توزعـه

بين اقرب الناس واقربهم ولالـك بعيـد

والله ماشفت شخص الا انت له او معـه

عين الضرير ويد العاجز وثغـر الوليـد

قسمت نفسـك لضيقـات الاوادم سعـه

من وحد الكـل بالحـب يتكلـل وحيـد

تجوع عينـك لشوفـة جايـعٍ تشبعـه

جايعك يشبع ويبقى جوع عينـك شديـد

وتيبس لهاتك على طفلٍ تسيـل ادمعـه

وتكفكف الدمع ستر..وعلم..وثياب عيـد

وحشة جهنـم ومـدت كفـك بمنفعـه

اختلفوا بكل شي الاّ بهـل مـن مزيـد

كفٍ وهي في رضـاه تشوفهـا طيعـه

وهي في زعلها الحديد اللي يفك الحديـد

يامعلم اللي اغتـر وقـل فيـه اسنعـه

علمٍ يسدد عوجه وما نعوج بـه سديـد

تهتف لك الراية البيضا وهي مشرعـه

هذا هو السيد ماهو كـل سيـدٍ بسيـد

وانا ..بوجهك اذا اعذاري ماهي مقنعـه

ظنيت نفسي ذهين ويمكـن انـي بليـد

اسمك يقدم وانا عن عمد مـن رجعـه

وفي الحالتين انت الاول مير كيف القصيد

والشعر لاصار عبـدالله علـى مطلعـه

بك يكتفي ياطويل العمـر وش يستزيـد

عتق الرقاب وفك قيـد المحابيـس

عادتـه مـاوالله خذاهـا سياسـه

هذا ملهسها على الطيـب تلهيـس

غيـره يطيـب بلجنتيـن ودراسـة

هله طحاطيح عنـزه والسناعيـس

خوالـه يشـوف المهالـك وناسـه

مـارد غيـر معذربينـه مفاليـس

المستقيـم مميـل عقـال راســه

تحت اخمص اقدامه تشوف القواميس

تقـرا دروس المرجلـه والحماسـه

يحـط مابينـه وبيـن المتـاريـس

شعبه فهم حراسه مـن الحراسـه

ماشيبـت راس الظـلام الفوانيـس

تشييبته في صابـر همـوم ناسـه

دربك وعر مير ابشري يالنواميـس

مايفطم عن ديـود مرقـا مداسـه

لطام خشم العايل مـروض بليـس

عبدالله املا يابحـر نصـف كاسـه

عل الفهد في ظل روض الفراديـس

اللي عهـد لـه بالـولا والرياسـه

ياشعر . واختلطت علينا الاحاسيـس

بايع .. وبارك له ..وعزه ..وواسه

سلامات تطول الغيم وعـذوق النخـل والطيـر

تزف ابه الشموس من النفوس لشيخها الغالـي

هلا ياللي خلقـت بيـوم راد الله بخلقـه خيـر

ابغنـي وابنطـح بالهـلا ياسـيـدي فـالـي

تمسكنا بحبل العـروة الوثقـى وهـو تدبيـر

تكافخ به بيارق عزنـا فـي المـر والحالـي

وسلمك الولي للشعب حـب وللوطـن تعميـر

وللمحتاج تـاج .. وللعـدا ضيـم وغربالـي

اسميك الجبال الشم والقـى بالحكـي تقصيـر

خفافك لـو نحملهـا الجبـال تـدور الوالـي

واسميك القمر زلـة لسـان ومالقابـه غيـر

شعـاع ينطفـي وانـت اول انـوارك بلاتالـي

اسميك المطر حاشاك لامامنت المطـر ياميـر

وهو لاعطا نزل واما انت تعطي وانت في العالي

اسميك انت .. مااسميك غيرك باخـر التفكيـر

بغيت القـى شبيـه لـك سـواك وماتهيالـي

الخميـس الـي تناثـرنـا بـجـوه

لين ضج الليـل عشـاق ومحانـي

بالنفيس اللـي خـذا الدنيـا مـروه

ماخذاهـا صولجـان وهيلمـانـي

ذعذع المـا والرطـب غنـا ونـوه

كل غصن بما عليه مـن الأغانـي

خابـر بينـي وبيـن الشعـر خـوه

ان بغيتـه جـا .. ولاجيتـه بغانـي

ياسمو اللـي تسامـا بـه سمـوه

بـك تعلمنـا عظيمـات المعـانـي

متعـب محبينـه .. مريـح عـدوه

بالعـطـا ذولا وهــذا باليمـانـي

السماحـه مـن تعالـيـم النـبـوه

وانـت كملـت السماحـه بالتفانـي

اثر مابه ليـل بـه صبـح مشـوه

وان صفا ماغير صبح .. وصبح ثاني

واثر مابه غير ضعف الصفـح قـوه

نقط . والمجني عليه يصيـر جانـي

واثـر تـو العمـر والقنديـل تـوه

والطريق اكرم كثيـر مـن التوانـي

وانت مـن سمـاك متعـب ماتفـوه

بالعبث , حاشـاه ماحاشـا لسانـي

في رواح الزعفـران وفـي غـدوه

وانت تعطـي كـن هالدنيـا ثوانـي

ماخلقك الله ب( ليـت انـه ) ولـوه

كملك واقصى الخلايق عنـك دانـي

طبيعـة السيـل ينـزل والبـشـر تـرتـوي

إلا المـآذن لطهـر السيـل فيـهـا صـعـد

ويا ابن آدم الرزق ما يضعف وربـك قـوي

والآدمـي رزق لرزقـه: كـفـاف ورغــد

وان قيل من يتبع الشاعـر ؟ قـل المنغـوي

وان قيل من يغوي الشاعر ؟قل ابـن الفهـد

عبـد العزيـز البحـر خيـره ومـا يحتـوي

عبد العزيـز البحـر شـره واشـروا اشـد

عبد العزيز البحر مـن غيـر مـا يرعـوي

موجه لساحل ، حشى موجه عن انـه يحـد

جا للفهـد خـادم وصاحـب وزيـر وخـوي

يا طيب طيب الأبو .. يا طيـب طيـب الولـد

يلـوي ذراع المكـارم والمـراجـل لــوي

ما احد خذا الطيب طيب ..الطيب غصب انوجـد

نجـم ولالـه مـن الأنـوار مـا يـنـزوي

حـر ولالـه مـن الأوكـار غيـر الـهـدد

لا من عطا ما بقى في النـاس عقـل سـوي

ولا من خذا كل مـن فـوق البسيطـه رشـد

ما ينتـوي ياصـل ..الواصـل قبـل ينتـوي

ولا ياعـد ويافـي ..الوافـي بليـا وعــد

أطيب من ال.. وأشجع ال.. وأعز من ..ينروي

فـراغ الاسمـا ولا تثمـر غصونـه باحـد

ولا هو بـالاول علـى الدنيـا لمـا يحتـوي

ترتيـب الاول علـى ثانـي يهيـن الـعـدد

الفكر فكـر حضـري والـراس راس بـدوي

وش يصلح الملح ؟ هـذا يصلحـه لا فسـد

رجل معه نجمـة الحكمـة تضـوي ضـوي

اعلـى جبيـن بهـا الدنيـا جبيـن سـجـد

جيتـه بهـم تـخـاف الـنـار لا تكـتـوي

باللي ترمد على اطرافه مـن امـس وهمـد

فزع كذا (تعرف انت النجـم كيـف يهـوي؟)

جـاك متجمـع كـذا مـا كنـه الا الحسـد

مثل الحسد شـيء بشـيء بشـيء طـوي

ما شابـه الا نقيـض الـروح بـه والجسـد

جيته وذيب النكـد وسـط الضلـوع يعـوي

واليوم أنا كيف آبـا اوفـي جميـل النكـد ؟

الحـزن دايـم مرتـب والفـرح فـوضـوي

والشعر ما يثبت مـن حـروف فكـر شـرد

يا رب انا ويـش انـا لـو مطمعـه دنيـوي

وش ينتظر مني انـت اجـزه عليـك العمـد

قالوا: كتبت؟!.. وقلت : لا.. واستحالهْ

على انّهـا زانت..وطابـت مشاهـي

وحضن الورق : يشتاق، والحبر : يَالَهْ

والشعـر: وادي هـايـمٍ باتجـاهـي

واللّي يلُـوق المـدح به..والثّنا..لـه

تاجي.. ونبراسي.. وعزّي .. وْجَاهي

هُـو فـال طيبـه.. طيّـب الله فالَـهْ

عبدالعزيز..وشَعْشَعْ النّـور .. باهـي

فَرْقْ القمر : نَقْصْ القُمَـر: واكتمالـه

وفرق البَحَرْ :..شحّ البحر..والتناهـي

يا ضيق مَجْلِسْهْ ان طرى «وسْعْ بَالَهْ»

عليك !!.. مـا هذا..لهذا..مْضاهـي!

تخفي يمينه جُودهـا.. عـن شمالـه

أثْر..العطا اللي تعرف الناس : وَاهي!!

عذْرَهْ معَهْ لو يَبْغض النـاس: مَالَـهْ!

سبايـب الفرقـا كريهـه ترا..هـي!!

يكْرَهْك يا ابن آدم: ابليـس وحلالـه!

كلّ طِـرِدْ مـن جَنّتِـهِ.. والملاهـي!

واحد.. طرد مـن جنّـة الخلد..حَالَـهْ

وواحد طَردْهْ اللي على الجـود راهـي

فِكْرَهْ.. سِعَةْ صَدْرَه.. كلامه.. ْعالَـه

وجود حكت بـه غفلتـي لا نتباهـي

لطف اختيار المفـردات.. ف.. جِدَالَـه

وعِفْة لسانه في الطريـف الفكاهـي!

ما شَابَهْتْ حتى خصالـه.. خصالـه :

دايم..هو اكرم منه : آمر..وناهـي !!

كـنّ الفهـد يومـه يسمّـي عيالـه

فَهَقْ له اسمه.. عَمْدْ..ما هو بلاهـي

وما هي غريبه..طبع ابـوه: العدالـه

من خِلْق يزها به..عسى دوم زاهـي

الشعـر فـي عبدالعزيـز. استحالـه

يكتبه حبري.. وتحكـي بـه شفاهـي

احتـاج لـي نَفْحَـة خيـالٍ.. هْبالـه

من فرط صدْقَه.. يعبر الكذب..ساهي !

لابد مـن صـدقٍ .. نبيـهٍ.. ودالـه

هو ..كذب..لكنه فطيـنٍ ..وفاهـي!!

حقيقتـي تعجـز.. توفّيـه.. مـالـه

من حق.. واخشى لا كذبت : انسفاهي!

له هيبةٍ تحمي _من الكـذب _جالـه

وسفن الحقيقه..غارقه فـي مياهـي!

لا احدٍ جهل جهلـي.. ولابـي جهالـه

ولا احد عرف عرفه.. ولابه..تباهي!!

فْ: هَذَا..وَابُو..هَذَا.. وْجَدّهْ.. وْخَالَـهْ

مَا يَعْجَزْ عنْ الشّعْرْ ..غيْر..الدّواهـي

علّ.. الخْيَال.. لْيَا تَخَيّـلْ.. خَيَالَـهْ :

يقْدَرْ.. يجيبْ اوْصافْهُمْ.. مثـل ماهـي

مافي القلوب الا سهر يابـس نجـوم

ومافـي العيـون الا قلـوب تسيلـك

ومافي الغيـاب الا كريـم ومحشـوم

ومافي الذهـاب الا ثنـاك وجميلـك

ومافي الضلوع الا عطيـب ومثلـوم

ومافي القدوع الا: هـن,الله وكيلـك

يااللي انت كنت الاطيب علوم وسلـوم

من جيت, .. ولمـا لانهايـة رحيلـك

وياللي انت كاسبهـا بخسرانهـا دوم

حصيلـك انـك ماتبقـى حصيـلـك

الموت لو ماهو مقـدر ..ومحسـوم

وماكنه الا أنـت وفزعـت لدخيلـك !

ماكانت هموم , وهي ان خليت هموم

يافهـد بـن سلمـان ماتنبغـي لـك

ياسابق جيلـك , ولا شحـت قـروم

ويا لاحق أجيـال , ولا هـان جيلـك

عطاك قبل الناس تجلـس بـه تقـوم

وغطاك قبل انـك تحطـه .. يشيلـك

جاريت أبوك , اللي ماجارنـه حلـوم

بالطيبات , وهو مـن اهـداك خيلـك

الطيبة قبـل يتقرنـس بهـا سـوم:

ان كانها ماهي لسلمان .. هي..لـك!

لقحت له اليوم الحساني , وجت : توم!

ودفن الحساني ..فعل أبوك وسبيلـك

آخر دلايـل شيختـك بشـت وهـدوم

واول دلايلـهـا طـهـارة شليـلـك

وآخر دلايـل شيختـك حبـة خشـوم

واول دلايلهـا .. زبـادك وهيـلـك

واكرم دلايلها : كم أنصفـت مظلـوم

واعظم دلايـل شيختـك : لادليلـك !

متواضـع الا لا بغـت كـل زيـزوم

ساحة وغا.. تفرق هناك في صهيلـك

عـز الله ان المـوت ماهـو بمليـوم

ماأحد يلوم أحد علـى أنـه يجيلـك !

دنياك دنيـا .. وانـت بدلتهـا اليـوم

الموت هي من ويـن تلقـى بديلـك

كفو .. هي مالها إلا واحد ٍ مثلك شديـد البـاس

إلى ضاقت على الحر الكريم وخانـت اظروفـه

كفو من أول حدود الأمل لآخـر حـدود اليـاس

ولا به ياس دام انك هنـاك ولـك بهـا شوفـه

ابو نواف ..أبو كل النوايـف رافعـات الـراس

ولد عبدالعزيـز اللـي حياتـه كانـت احتوفـه

طلال وقبل احدر حاجتـي يرقـا لهـا قرنـاس

كثر عرفه بجهلي شفت انـا جهلـه بمعروفـه

جلس مثل الرضا في قلب من صلى العشا بنعاس

وقف مثل العفو فيـه مثلـه ساعـة اوقوفـه

عزيز ٍ في الحياه ليا صمد ماكن فيـه إحسـاس

ذليلٍ في الصلاة اليا سجد ما قـام مـن خوفـه

كريم ٍ والله إنـه يستحـي مـن ردت الأنفـاس

إلى منـه عطاهـا للهبـوب وردت الـجوفـه

وش أكتب يالقلم يالمحبـرة يالليـل يالقرطـاس

تعزبـت المعانـي والمعانـي كانـت ضيوفـه

كفو ماهي كفو اللي صارت لحيْ الله من النـاس

كفو للي كفو لو كملوها صـارت كفـو ..فـه

ياسمـو المرجلـه والكـرم والاحتـشـام

ياسمو الجدو والجود منـك وفيـك ضافـي

ياسمو البحر لاارخى عـن المـوج اللثـام

ثم هدر يعطي وياخـذ بلاديـن .. ومنافـي

ياسمـو الكبريـا والتـواضـع بانسـجـام

ياسمو النجم حاشاك : بعض النجـم طافـي

سيدي من وعليـك وبـك وفيـك السـلام

سامح اللي قصرت بـه طواريـق وقوافـي

مـن بدايـات الكـلام لنهـايـات الـكـلام

مالقيـت اللـي يوفيـك حقـك يالسنـافـي

يامحمـد ياسمـي النبـي نسـل الـكـرام

والله انك مدهـل الطيـب عريـان وحافـي

عـاد يـوم الله عطـاك بعطايـاه الجسـام

كيف ماتركض لك النـاس محتـاج ولافـي

انت علمت العـرب كيـف يوفـون الذمـام

وانت علمت العجم كيف بعض الموت : شافي

خالقـك ربـي تضيـم ان بغيـت ولاتضـام

وكملك بالعدل حتى غديـت العـدل صافـي

مـن شجاعتـك المنايـا تسميـك :الـزؤام

ومن لطافتـك الحنايـا تسميـك :الخوافـي

ومن قصايـدك المعانـي تسميـك :المـرام

ومن عوايـك الأمانـي تسميـك :المرافـي

ومن عطاك الجود سمـاك :حسـاد الغمـام

ماتركـت الغيـث يفـرح بغيثـه للضعافـي

غثتهـم قبلـه ولاهـي غريبـه يالحسـام

سلـك الله للعطايـا وقـال الجـود كافـي

غثتهـم قبلـه ولا كـن لـك عيـن تنـام

قبـل ترتـاح الخلايـق .. وتلتـم العوافـي

يعـذر المومـن اذا عيـد بشهـر الصيـام

يوم شاف هلال وجهك بشـوش ومتعافـي

جيت لك شايل ثلاثين عـن تسعيـن عـام

رامي في بـاب وجهـك عذاباتـي خلافـي

والله اني من جماعـه بهـم شـد الحـزام

مايخيـب ان طوحـن الغناديـر الغـدافـي

شمـري مـن السعوديـه الارض الحـرام

مثل ماحرمت عليـك النواقـص والهوافـي

لكـن الدنيـا رمتنـي ولاخـلـت سـهـام

ماتلت فـي ضلوعـي تشـاف وماتشافـي

ياسمـو المرجلـه والكـرم والاحتـشـام

ياسمو الجود والجود منـك وفيـك ضافـي

سيدي وانـت البدايـه ولالـي بـك ختـام

كان شعري جاحد الطيب انا بالحيـل وافـي

البشـر والشـوارع والمسـاكـن

ليلها المغتسل فـي صبـح باكـر

السحاب .. السحاب .. ابيض وداكن

التـراب .. التـراب .. اول وآخـر

القلـوب القلـوب اللـي تمـاكـن

من بعضها بعض والعشق سافـر

العيون ان خذت من غيـر هاكـن

النفوس ان عطت من غيـر ذاخـر

رفعة الراس فـي انسانهـا ,كـن

خالـد الفيصـل ارسلهـم منابـر

هذي الارض فيهـا شـي راكـن

في الحنايا وفيهـا نبـض ساحـر

كني اعـرف بهـا كـل الاماكـن

كنـي اقـرا بهـا كـل الدفـاتـر

ليه ابهـا .. انـا مـدري ولكـن

كن فـابها طفولـة كـل شاعـر

اللـي تعـب واسترحنـا نتعـب ويستريـح

قـل للتعـب يبشـر بسيـلٍ يهولـه عـدد

اليوم اذا يبسـن الاريـاق يبسـن صحيـح

ياضيـق الاثنيـن للمستبشريـن الاحــد

الدمـع يسبقـه باقيـه انحـدار ومطـيـح

فاللي نـزل مـن مدامعنـا علينـا صعـد

مات الكريـم الحيـي المستقيـم الصريـح

اشجع هل الارض واخوفهم متـى ماسجـد

لولا المنايـا منايـا كـان شفـت الطريـح

أي الصدوقيـن واوفاهـم وعيـد ووعــد

لاشـك ربـه كتـب ماللمنـايـا نطـيـح

نفنـى ولا دايـم الا وجـه واحـد احــد

يارب كانه ستر نفس وحفظ عـرض زيـح

عن وجهه النار واغسلـه بسحابـة بـرد

أنت الكريم وتحـب مـن الوجيـه الفليـح

بشر من احسن بك الظـن بـدروب السعـد

عز الله انه عـدل فينـا عسـى الله يبيـح

لـه ويغفـر ذنبـه ويجزيـه عنـا رغـد

عف . وعفى . واصلح وجاهد وصان المليح

ولافارق اجر الصواب اجره علـى ماجتهـد

ياحي الافعال من مسـك وقرنفـل وشيـح

لاطـاب طيبـك ولا سـوى سوايـاك احـد

في الميتين الرثـا يكتـب وفيـك المديـح

يكمـل مديحـه بوصفـك ياعظيـم البلـد

جمع البخاري ومسلـم للحديـث الصحيـح

جمعك صحاح الشيم والطيب متـن وسنـد

خمس وثمانين عام وكون صـدرك فسيـح

قل يعقب من نكر فضـل يهبـا مـن جحـد

والفرق بعد المهد يظهـر وقبـل الضريـح

يافـارقٍ فالضريـح وفــارق ٍ فالمـهـد

من استطاع السبيل وحـج فرضـه يطيـح

ومن طاح فرضه رجع شايل جمايـل فهـد

ماهبت الريح تبقـى وانـت لا هـب ريـح

اعف الالسن جميع واكرم هـل الارض يـد

لوماتسمـى ملـك ماظـن ربـي يتـيـح

هـذا الاسـم للبشـر مـن قبـل ولا بعـد

وقت الرخا يكثرون اهل اللسـان الفصيـح

يا افصح النـاس لاضاقـت وعـز السنـد

ان كان فيما كتب خادمـك ضـي ٍ شحيـح

ياسيـدي فاللسـان مـن المصـاب انعقـد

واللي جهل في حضورك علم الامر القبيـح

تعلـم ف غيبتـك جهـل الصبـر والجلـد

وهو بس اناللي ضلوعه من دموعه تسيـح

المملكـة والعـرب والمسلميـن وبـعـد

يالله بصبـر بـلا سلـوان يشفـي جريـح

سلوان مثلك ماهو حاصل ولا اطلبـه ابـد

ياوالدي كل عـرق مـن عروقـي يصيـح

يامكرمـك والـد يابخـل بخـلـي ولــد

لو الحزن دمـع الله يحـرم يبـاس المـوق

على العين ليـن يغـرق الجفـن مجهاشـه

ولو الوزن شمع اللي من كبودنـا محـروق

ينيـر الظـلام بنجـر الاضـلاع مهبـاشـه

على سلم جدانـه يمـوت و جبينـه : فـوق

لو ان الجدي يرقى على سهيـل مـا ناشـه

وطيب لو ان المسك ما ارخصه عرض السوق

غدا مـن قواريـره ومـن طيـب غراشـه

"طلال الرشيـد" اللـي تجيـه المنايـا بـوق

على صدق وعد الموت ، الاسبـاب غشاشـه

نصاه الرصاص : ضيوف ! قلطهم :المعلـوق

وعشـى ضيوفـه مهجتـه !رابـط ٍ جاشـه

يا ربع يهبا ريح الفشـق وشكثـر معشـوق

تقل .. عيب احد من "شمر"يمـوت بفراشـه

وهذا مهـو بايـات احـد يعجـز الطـاروق

يوفيه قـدره لـو هـو السحـر وادهاشـه

أمير التواضـع و الحيـا و الأدب و الـذوق

والاخـلاق ملفـى كـل طيـب و مطراشـه

سرى للنوايف _ راس "شمر"مهـو مسبـوق

تقـل وحـده "السـاري"والآنـام "غبـاشـه

نعـم ..مايكبـره "اللقب"يكبـر المنـطـوق

بالافعـال وعـزوم الرجاجـيـل بطـاشـه

حثينا على وجه السحـاب :التـراب حقـوق

لو الله عفـا منـه اكـرم الخلـق ماحاشـه

يا رب اغفر لعبدك "طلال الرشيـد" وسـوق

له مـن البـرد مايبهـج الـروح رشراشـه

وعسـى "ربـي الله ونبيـي محمـد "طـوق

يوقي بها عـن ظلمـة القبـر ..واوحاشـه

بجاهـك وعـزك وبجلالـك ياربـي عـوق

عن النار جسـم عـل "الاستبـرق" قماشـه

يا رب وعسى صحبته "ابو بكـر"و "الفـاروق

بقدرتـك ياللـي تـرزق الطيـر باعشاشـه

يا رب وعسى اللي عندك من السعد مفهـوق

له بكـل عمـر ماتـه ابـن ادم .. وعاشـه

بيوت الطين , رفرفة الحمام , وغبشة استحـواذ

مراجيح الشفيف مـن الفواكـه لاطـرف السلّـه

عذوق الهمس من نخل السهـر , لاهزهـا نفـاذ

من عطور الحنين الخابـز ارغفتـه علـى ملّـه

ضيا قمرا زز هي اكرم من عطا ضي وهي الشحاذ

تقول ليا عطـت وليـا خـذت : هـذا لوجـه الله

ربيع ( كبودنا ) ترعـى حمـاده ضجـة الأفـلاذ

شغب غمازتين , وهيـل نصـف مـوارب ودلّـه

تفوح بطيبها -المبطـي بهـا- ياطيبهـا الأخـاذ

جمعك فحنجرته وموّلك , والغيـم مـوّل .. لّـه

نهض يستكمل النايـات فـي جغراقيـا الـرذراذ

طلال .. وكـل فوضـى رتبتنـا جسـدت : ظلّـه

وتر .. ضد اليباس وخـارج الاسمنـت والفـولاذ

هنا لغز البساطه في موسيقاه .. وهنـا .. حلّـه

هو اللي ذوب ( الرا ) في طفولة ضيه .. استلـذاذ

هو اللي ذوب الدنيا في ( رابـع ) أحـرف العلّـه

كريم الروح .. مد من الجسد خمسين جـرح ولاذ

بنا , كيف انعمينـا عـن تعـب ريحانـه وفلّـه

أغاني ( الفيديو كليب )وموسيقى شهـوة الافخـاذ

نهشته قمح قمح وحنطة حنطـه .. هـوى كلّـه

هوى .. فجأه .. عرفنا كم تخاذلنا عـن الإنقـاذ

لغاية مافرغ كرسي الخشـب مـن بحـة مولّـه

وقف خمسين عام استاذ للمعشب وطـاح استـاذ

وظلت ريشـة الطيـر فـيـده خضـرا ومبتلّـه

بعض نصوص الشاعر بصوته



أبطيت
[line]
الصورة
[line]
النظره السمحه
[line]
حد العطش
[line]
دخيلك
[line]
فتنة الحفل
[line]
قصيدتي
[line]
مريم
[line]
ذنب ومغفره
[line]
هذا القلم وش كتب
[line]
مدد
[line]
ياعلي
[line]
غالية البقمية
[line]
لعب عيال
[line]
غنى المغني
[line]
الفواكه والسلال
[line]
كيمياء الغي
[line]
الكرز
[line]
مرجع الدنيا
[line]
عبث
[line]