قصة خالد وبندر

#1 (**permalink**) 04-12-2010, 09:23 PM

السلام عليكم هذي قصه قريتها و عرفت المعنى الحقيقي للصداقه اقروها وقولوا رايكم
تراها عشر اجزاء بس اقروها راح انزلها اجزاء

[1]
الصداقة من أقوى العلاقات الانسانيه
علاقة يميزها أنها تجمع عدة مشاعر وأحاسيس في إطارها مثل المحبة ،التضحية وغيرها
يمكن اغلبنا أو اقدر أقول يمكن كلنا حصلت له مواقف مع أصدقاءه
منها الحلو ومنها المر, منها اللي تقوي العلاقة ومنها اللي تنهيها
قصتي تتكلم عن هالموضوع
تقدرون تقولون أنها تحمل مشاعر أكثر منها أحداث
لكني قررت بعد تفكير طويل أني اعرضها للناس عشان يستفيدون منها
إحنا كمجتمع للرجال حدود الصداقة غالبا معروفه عندنا
واغلبها تكون للوناسه والمصلحة
أنا مااقول الكل بس أكثرها
لكن اللي صار معي شي ثاني
وهذي قصتي...(انا اسمي بندر)

في عام1408هـ ,كنا تونا منتقلين لمدينه الرياض والدر اسه بدت من أسبوعين تقريبا
كنت في سنه رابعة ابتدائي
دخلت فصلي الجديد وسوا الأستاذ تعارف بسيط بيني وبين الطلاب
لما جا وقت الراحة طلع الجميع إلا أنا
دخل ولد اسمراني شعره حوسه وأسنانه الأربع الاماميه اللي متكسر واللي طايح , مشمر أكمامه ووجهه كله مخوش وحالته لله
إلا انه رغم كل هالبلاوي فيه شيء يخليها مو باينه!!..
قعد يحوس في شنطته ساعه وكل دقيقه يطلع خرابيط
وكل شوي يرفع عينه عندي واخيرطلع منها نبيطه
وقبل لا يطلع التفت علي وكان من النوع الي كنه بينطحك وهو يطالع
منزل راسه شوي ومعبس طول الوقت
بس كانت بريئة أكثر من أن تكون مرعبه!!
وقال بلدغه طفوليه سببها واضح وهو أسنانه اللي حالتها صعبه
أنت الحين ليش جالس لحالك؟..
كانت هاذي أول جمله سمعتها من الإنسان اللي صار بعد كذا أغلى البشر على قلب
كان معروف عني إني انطوائي ومنعزل
هاذي طبيعتي حتى إني اتوتر لما يكلمني احد ما اعرفه
رديت عليه:بس كذا أنا ما آبي اطلع وبعدين أنا ما اعرف احد هنا...
وبنفس النظرات اللي والله اعلم إنها كانت عاده عنده...
تعال معي وآنا اعرفك على نص اللي فالمدرسه...
كان يجرني من يدي وانا اسحبها بخوف...
لا لا انا كذا مرتاح قلت لك ما ابي اطلع...
لكن الولد اصر لين طلعني معه بالغصب
وزي ما قال عرفني على نص المدرسه تقريبا
لكن تبون الصدق حسيت اني تعلقت فيه هو!!
يمكن عشان شخصيته عكسي تماما اجتماعي,خفيف دم والكل يحبه ويحاول يتقرب منه
صحيح انه كان شيطاني ومشاغب لكنه ماكان يتعدى على احد!!
حسيت اني مبهور بشخصيته
ورغم انه ذكي جداً الا انه فالدراسه ما كان بالحيل
بس كان يعرف يمشي عمره من يومه صغير
وعلى كثر الأولاد اللي يعرفهم إلا انه بعد تعلق فيني فوق ما تتصورون
صرنا ما نتفارق ابد ولا يشوفون واحد فينا بدون الثاني.
مرت السنوات وصداقتي تزداد قوتها مع خالد..
مرت علينا سنين الطفولة والمراهقة وحنا سوى
ودخلنا الجامعة وتخرجنا وحنا ما عمرنا تفارقنا
حتى في السفر ما اذكر إن واحد سافر بدون الثاني إلا إذا كانت السفرة مع الأهل
اغلب الناس اللي يعرفونا يحاولون ياخذونا قدوه
وكثير منهم يضربون المثل في صداقتنا
يمكن تتساءلون وش سر هالصداقه العميقه؟!!
شي واحد كنا نطبقه بدون ما نحس من يوم حنا صغار
شي عجزت اغلب الناس انها تفهمه في تعاملها مع بعض
وهو ان كل واحد فينا كان متقبل الثاني بكل ما فيه من العيوب
ولا عمر واحد فينا حاول يغير الثاني ويمشيه على طريقته برغم الأختلاف الكبير بينا..
خالد كان فيلسوف بالفطره وبسبب علاقاته الكثيره
وكنت اتعلم منه كثير
لما اسأله كيف يقدر يجمع كل هالناس حوله
كان يقول كلمات بسيطه لكن تركت فيني اثر كبير
كان يقول:اسمع يا بندر الناس لها مشاكلها وكل واحد فهالدنيا صدقني منشغل في نفسه ولا احد تهمه مشاكلك فاذا تبي الناس يحبونك انسى نفسك وفكر فيهم وكيف تساعدهم في حياتهم بقد ماتقدر.
قصتي الاساسيه اللي ابيها توصلكم مو في كيفيه صداقتنا لاني مهما شرحت ماراح اقدر اوصلكم مدى عمقها

لكن الحدث اللي قلب حياتي ولا أظن ترجع زي ماكانت

في يوم اربعاء جاني خالد للاستراحه اللي نجتمع فيها مع الشباب
والفرحه مبينه في عيونه
وسحبني من بينهم..
.تعال بندر ابيك في كلمة راس..
لما صرنا برى...
عندي لك مفاجأة ...
وابتسم
انا ذاك الوقت اللي يشوف وجهي يقول خبل اناظر فيه وفاتح فمي...
كمل كلامه..
ابشرك الوالده خطبت لي!!!
في هاللحظه حسيت كأن احد عطاني كف على وجهي...
ايييييييييييييييييييش؟؟؟؟!!!!...
طالعني بنفس طريقته يومه صغير واللي ماتغيرت ابدا...
وراك تقولها كذا كنك مو مبسوط...
وبإرتباك رديت ...
لا مبسوط بس انت فاجأتني وصدمتني صراحه! .. ما عمرك جبت طاري للزواج!!!!...
ضحك وهو يغمز...
عارف بس الوالده اقترحت علي الموضوع وقلت لها مافي مانع .. توقعت ان السالفه كلام او عالاقل بتاخذ وقت بس ماشاءالله عليها يومين الا هي جايتني تقول ترى لقينالك .. الظاهر انها حاطتها في بالها من زمان .. وبعدين ما عاد الا خير والا شرايك؟!!...
يعني للحين ما شفت البنت يا خالد ...
آفا عليك بس يا بندر!!! .. الحين اقولك توي داري وجيتك بسرعه ..الوالده تقول انهم حددوا يوم الاثنين عشان اجيهم اشوفها...
تفاجأت...
الله بهالسرعه؟؟!!..
خالد: مو اقولك شكل السالفه مطبوخه من قبل
..على كلا" الله يوفقك انشاءالله..
عقبالك_ يالرَمَت_
(خالد لما كان صغير كان يحاول يناديني بكلمه الروميت الانجليزيه لكنه كا ن يقولها بهالطريقه ومشت معنا كذا صارت زي اللقب بيني وبينه)
اغتصبت ابتسامه...
لا وين تو الناس علي المهم الحين خلنا نرجع للشباب لا يبدى التعليق...
وبتعجب ممزوج بغضب مصطنع رد خالد...
لحظه لحظه بندروه الحين اقولك خطبت وزحمه ولا تعزمني على شي بهالمناسبه؟؟!!..على الاقل ودني لكوفي شوب ياخي!!
ضحكت...
لا ياعمي الحين قهوه وبعد شوي الا احنا في واحد من هالمطاعم حقتك اللي فواتيرها تكسر الظهر .. تراي اعرفك زين خلاص عشرة عمر...
رد..
والله انك قعيطي مستخسر فيني؟؟ ..
.وقعدنا نضحك
حطيت يدي على كتفه..
ولا يهمك يا خالد اذا صار شي اكيد , ابشر بذيك العشوه اللي يحبها قلبك فالمطعم اللي تختاره وش تبي بعد؟؟!...
"كان ودي اعزمه بس النفسيه عدم"..
رد بغمزه..
ماتقصر اصيل يا بندر بس اهم شي لا تفشلنا مثل ذاك اليوم!! ...
افشلك!!.. متى ياويلك من الله؟؟!..
عطاني نظره اللي مو مصدق...
معقوله نسيت ذاك اليوم يوم يمدح لنا خوينا سامي ذاك المطعم ,قلنا لازم نجربه ونشوف...
لما تذكرت الموقف بديت اضحك...
اوووووه الله يقلع شرك .. وش ذكرك بهالموقف الحين..
ابتسم خالد ويده على وجهه...
تذكر؟؟ .. يومها طلبنا عصير وطقيت الصدر يعني انت اللي بتدفع ويوم جا الحساب جت معه المصيبه، والله لو انك شايف وجهك يا بندر يوم شفت الفاتوره تقول صابين عليك مويه بارده...
انحرجت...
لا والله!!! .. على الاقل احسن من اللي قعد يتفلسف ويسوي روحه ابو العريف,لا وتاشر بيدك بعد كننا في ملعب
وبديت اقلد صوته ونظرته المعروفه...
لو سمحت الفاتوره مو لنا حنا طلبنا عصير بس! .. والله لوك شايف وجهك انت يوم رد عليك..."نعم ياسيد هاذي فاتوره العصير بس" .. الحين من اللي طلع فشل الثاني؟!...
ابتسمت...
اذكر مابقى في جيوبنا شي ما طلعناه ويالله كفى ولقطنا وجيهنا وطلعنا وحنا نتصدد لا احد يشوفنا..
وطوال ماكنت اعيد القصه وخالد ميت من الضحك
كان يسعدنا ان حنا نعيد الذكريات اللي مثل هاذي
المهم رجعنا عند الشباب
من بدا موضوع الخطبه حسيت انه خلاص ماراح يرجع شي زي اول
تضايقت مره بس ما ادري وش اللي فكرت فيه
يعني مستحيل نقعد كذا بدون زواج للابد كان واقع لازم ارضى فيه.
لما رجعنا داخل كان مستانس,يلعب,يضحك وينكت صحيح هاذي عادته لكن اليوم كان بزياده
اما انا كنت عكسه تماما .. حسيت اني بأفقد هالأنسان...
الشخص الوحيد اللي اعتبرته صديقي

04-12-2010, 09:24 PM

[ 2 ]

يوم الاثنين العصر جاني للبيت!!
خفت يكون صاير شيء...
خير خالد عسى ما شر...
وبتوتر واضح في صوته..
ابد والله احس اني متوترشوي...
ابتسمت له...
يابن الحلال شده وتزول زي غيرها...
ابتسم وقال...
وشرايك تجي معي!! ...
قعدت اطالعه ابي اتاكد انه جاد ...
انت صاحي!! .. وين اجي معك؟؟!
طيب تعال وخلك فالسياره بس...
شديت على يده وحطيت عيني في عينه
وقلت:يابن الحلال رح لحالك وانا بستناك في بيتنا طيب!!.
كان يطقطق اصابعه...
ادع لي يالرمت...
ما يحتاج قول الله يوفقك ويسنع دربك ان شاءالله, يالله عاد الحين رح وحلق وتكشخ تلقاك شهر ما دخلت الحلاق على هالوجه...
كنت احاول اضحكه لانه واضح انه متوتر...
طيب اجي عندك عشان تشوف شكلي قبل اروح لهم...
كتمت ضحكتي...
انا لله وانا اليه راجعون؟!! .. انت وبعدين معك ياعمي اصلا البنت اول ما تشوف عيونك بتوافق لا
تشيل هم وتوكل على ربك ...
الله يستر ما ادري وش فيني خايف ياعمي؟!...
(كلمه ياعمي معروف اني دايم اقولها فاذا قالها خلود لي يعني خلك معي او افزع لي زي ماتقولون كانت كلمات بينا)...
عادي كل العالم يتوترون في هالموقف بس انت شد حيلك ولا تتأخر على الجماعه...
طلع من عندي,
وبعد العشاء كنت انا اللي ما ادري وش اسوي بعمري من التوتر وكل شوي ادق عليه
لدرجة ان ريم اختي حاولت تهديني...
ما صارت يابندر يمكن انت متوتر اكثر منه...
ياريم هذا خالد تعرفين يعني وشو خالد هذا اقرب لي من نفسي...
والله عارفه بتعلمني فيكم بس اذكر الله وهد الوضع شوي...
ما بقى عندي صبر وطلعت للشارع استناه
بعد حوالي الساعه شفت سيارته مقبله بسرعه جنونيه كالعاده
لدرجة انه بغى يدخلني تحتها لولا اني بعدت بسرعه
نزل وشوي ويناقز من الفرحه..
وبرعب صرخت فيه ..
خلووووود!!!انت خبل بغيت اروح تحت سيارتك..
ناظرني نظرات جديده علي وابتسم..
سألته..
ها بشر؟؟ ...
لمني الرجال وعرفت انها دخلت مزاجه لدرجه انه ما عاد يدري وينه فيه
المشكله انه يتكلم ولا فهمت من اللي قال ولا حرف
كنت اعرفه عاطفي بس ما توقعت انه يتعلق لهالدرجه وبهالسرعه
فرحت له لما شفت كل هالسعاده فيه
لكني بديت اتخيل وشلون بيصير حالنا بعد هالتغير اللي ما طرى على بال
يمكن تستغربون ليش كنت متخوف كثير بس صدقوني لما يكون عندك انسان موجه لك كل ذره في كيانه وكل فكره معك ولفتره طويله من عمرك وفجأه يجي من يشاركك فيه
صدقوني تتلخبط حياتك ولو كانت المشاركه بسيطه وشلون لو جا الانسان اللي بيصير منافس لك؟!
مو حب تملك لكنها عاده وغلا كبير...
قطع حبل افكاري خالد وهو يقول
على فكره بندر في شي ابي اقول لك اياه...
وجهه وهو يقول هالكلام ذكرني بوجهه لما جا يعلمني انه سرق شاهي وحليب من غرفة المدير واحنا صغار
قلت بأبتسامه..
وش مسوي بعد هالمره؟؟...
مسكني بيدي وجلسنا على رصيف بيتنا
حسيت الموضوع جد
قال: صراحه يا بندر انا ما قلت لهم اني ادخن؟!! .. لحظه قبل لا تقول شيء .. اصلا هم ما سألوا الا اليوم .. وانحرجت .. وقلت لهم .. لا ما ادخن .. خبرك خفت يرفضون...
افا ليش يا خالد تبدى حياتك بكذبه تافهه؟!..
ومن قال لك انها كذبه؟! .. اصلا انا نويت اني اوقف زقاير...
انا لما قال لي كذا ضحكت!!
تذكرت السنين اللي كنت احاول فيه انه يوقف
وكيف انه حاول كم يوم ولا قدر وفالاخير لما اشوفه يعاني نستسلم
لكن من عيونه واضح انه كان مصر ومصمم هالمره على هالشي والله العالم
بندر اكيد بيجون يوم ويسألونك انت بالذات من بد الشباب عشان كذا حبيت اعطيك خبر..
مو شرط يا خالد بالعكس كثير ناس مايفضلون يسألون الاصدقاء المقربين وطبعا واضح السبب,لكن لو جاني احد وسألني عنك ماراح اكذب عليه
بقوله هالكلمتين يالرمت:
خالد صديقي من سنين والف النعم فيه بس انا متفق معه لما نتزوج محد يعطي معلومات عن الثاني عشان الإحراج لان زي ما الواحد يقول الحسنات لا زم يقول السيئات مافي كامل فهالدنيا هذا زواج مو لعبه وحنا ما نبي نضطر لهالشي, بس اذا تبي العلم باختصار لو طلبني اختي عطيته اياها وهذا كل اللي عندي..
لما انتهيت من كلامي ربت على كتفي وقال
ريحت بالي ماخاب ظني فيك يالرمت انا اشهد اني عرفت من اخاوي
توادعنا وركب سيارته
دخلت البيت وانا احس بضيقه شديده
صحيح دخلنا الـ 26 .. ذاك الوقت يعني طبيعي اللي قاعد يصير
لكن ما ادري وش اللي كان صاير معي
كان يكلمني كل يوم عن المستجدات اللي صارت
ويسألني اذا كان احد جاني من اهل البنت jjb
وانا اقول له للحين ما شفت احد وحتى لما نتقابل طول الوقت يتكلم فهالموضوع
بيني وبينكم بديت اطفش
صار كل كلامه عن زواجه
لكن اللي معجبني في هالسالفه كلها اصراره على ترك التدخين
صحيح حالته كاسره خاطري
يعني الصداع ماتركه ابد
وعيونه دايم حمر
ونفسه في خشمه طول الوقت
والربع كلهم يحطمونه يقولون اول ما تتزوج بترجع لا تتعب نفسك
بس في تقدم قعد اسبوع وشوي بدون ولا زقاره
كان مصر على هالبنت ومايبي شي يوقف في طريقه
وخالد صديقي واعرفه زين
اذا حط شي في باله يجيبه.......

بااقي الجزء ,الثالث ..و.......إلى العاشر...!
اذا فيه تفااعل حطيته هع <<اكشخ ....
والله القصه حلوووووووه لاتفوتكم وتعور القلب بعد.بس فيهاا فاايده مرره حلوووه ,., بلييييييي

04-12-2010, 09:25 PM

[ 3 ]

يوم الخميس زي عادتنا كنا مجتمعين انا والربع فالاستراحه وخالد للحين ما جا صار دايم يتأخر لكن عمره ما تركنا
كنا جالسين بعضنا يلعب ورقه والباقين يسولفون
انا كنت العب
وسمعنا صفقة الباب اللي برى وبما ان خالد اللي ناقصنا عرفنا انه هو
وبدى التعليق اللي يقول
جانا العريس
والثاني يقول
الله يعينا عليه من اول ما وقف زقاير وهو نار شابه
قلت لهم:
كلش الا خويي عاد لحد يغلط عليه وانا موجود ...
وقعدنا نضحك
فتح باب الغرفه والتفت اسلم عليه ماحسيت الا واحد يرفعني من القلابي ويلزقني عالجدار بقوه
لما حاولت اعرف من هو الا هو خالد
كان معصب ويصرخ في وجهي ويدفع جسمي عالجدار بطريقه عنيفه
كنت مصدوم واطالع فيه مو فاهم شاللي صاير
حتى ربعنا يطالعون بتعجب
ولما استوعبوا ان السالفه هوشه قاموا يفكونه عني
في هاللحظه انا للحين ما بعد استوعبت الموقف بس يوم شفتهم يسحبونه عني حسيت انهم اوجعوه
بديت ابعدهم معه واحاول احميه بيديني كنت خايف عليه وجسمه صار احمر من تسحيبهم الشديد
وانا لهاللحظه ما ادري وش صاير
لكنهم كانوا اكثر منا وقدروا يمسكون كل واحد في جهه
سامي كان يسأل خالد بعصبيه:
انت صاحي؟!! وش جاك انهبلت؟!وش صاير؟!
ورد خالد بصوت انسان ثاني ما عرفه وياليته ما تكلم:
اسأل هالجبان اللي قدامكم وش سوى لا تسألوني انا..
في هالوقت بديت استوعب الموقف...
خالد قدامي في حاله عمري ما شفته فيها
معصب والكلام يطلع مقطع منه بسبب تنفسه السريع
نظرته ماغيرها تطل من عيونه بس الحقد حل محل البراءه؟؟
كان كل شوي يحاول يتخلص من يدينهم عشان يضربني!!
تصوروا!!
بعد كل هالعمر وهالعشره يضربني
انا بندر صديق عمره ورفيق دربه
قلت له وانا احاول اقرب عنده اهديه:
وش بلاك يا خالد انا وش سويت ياخوي؟!
رجع يحاول يتهجم علي وابعدوني عنه بسرعه..
لا تقول ياخوي انا لاني اخوك ولا اتشرف اكون اخوك
وبصوت تخالطه البحه من شدة الصراخ وهو يمسك راسه بين يدينه بعصبيه..
وبعدين لا تقول وش سويت ياحقير لا تنرفزني زياده...
خفت عليه كان يصارخ ما يتكلم ويطلع كلامات زي السم...
لما ما تكون قد الكلام اللي تقوله لا تقعد تتفلسف علي يا اكبر كذاب..
قال سامي..
خالد وش هالكلام؟!! كبر عقلك وخلنا نفهم القصه...
صرخ فيه..
انتم لا تتدخلون
ورجع يطالعني وهو يضرب على صدره بقهر واضح..
انت ما شفتني اموت فاليوم عشرين مره وانا احاول بكل ما فيني اني اوقف زقاير..؟ ليش تقولهم اني كنت ادخن ليش؟!...
كنت هاللحظه زي الغبي وعيوني بتطلع من مكانها
رديت..
خالد انا قلت لك محد جاني ولا احد سألني--..
كلامي زاد ثورته وقام يتحرك زي المجنون..
هذا اللي يبي يذبحني .. بندر لا تكذب لا تكذب ما ابي اسمع منك ولا كلمه صحيح انهم رفضوني بس ما يهم البنت بدالها الف
وبدت نبرة صوته تخف حدتها..
لكن انت ليش سويت كذا يا بندر ليش؟! الكلام اللي قلت لي ذاك اليوم كان كله كذب وتمثيل؟!!على الأقل ليش توعدني وتخلف لو قلت انك بتعلمهم كان تفهمت الموضوع, انت حطيتني في اصعب موقف، معقوله استخسرت السعاده اللي انا كنت عايشها ولا قدرت تستحمل فكره اني ابعد عنك شوي!! معقوله يا بندر انت من بد هالعالم كلهم تسوي فيني كذا هذا جزاي اني عزيتك؟؟!..
رجعت النبره العاليه..
ما توقعتك كذا ابدا انت انسان اناني تعرف يعني ايش اناني؟!
حاولت اتمالك نفسي ورديت بصوت هادي قد ما اقدر...
بس لا تكمل لا تقول كلام تندم عليه بعدين يا خالد لا تظلمني وانا اخوك...
ضحك بسخريه..
اندم!! اندم على ايش والا ايش؟! على العشره الحلوه اللي كانت بيننا والا على16 سنه اللي ضيعتها من حياتي على واحد مثلك والا عالانسان اللي توقعته صديقي وما طلع----
وقبل ما يكمل كلمته هالمره انا اللي تخلصت من يدينهم وهجمت عليه ورميته عالأرض
ولما ثبته تحتي رفعت يدي لكنها وقفت وكل عضله فيني ترجف رجفه فظيعه
لان اللي تحتي كان خالد,خالد الرفيق !! خالد الغالي !!
يارب انا وش قاعد اسوي معقول امد يدي عليه؟!
صرخت في وجهه...
اسمع يا خالد كل الكلام اللي قلته ممكن اتغاضى عنه عشان المعزه اللي لك بقلبي ولاني متأكد انه فيه سوء فهم فالموضوع اما انها توصل فيك انك تقول اللي بيننا ما كان شي فهذا اللي ما راح اسمح لك تقوله فااااهم؟!...
خلص يدينه من يديني ودفعني من فوقه..
اقول ابعد عني بس...
وقف وانا للحين على الارض...
اسمع يا بندر هي كلمه و رد غطاها .. ما عاد ابي اشوفك ولا عاد ابي اسمع صوتك او حتى طاريك وكل اللي كان بيننا اليوم انتهى, الانسان المخادع اللي ما يقدر الصداقه ماله مكان في حياتي ابد, واذا كنت سويت هالحركه خايف انك تفقد جزء مني يا طفل ابيك تدري اللحين انك فقدتني للابد.
طلع من الاستراحه بنفس الحال اللي دخل فيه
واشرت لسامي وانا احس بأرهاق شديد :
اطلع معه الله يعافيك لا يسوق السياره وهو على هالحال بعد هو مب ناقص جنون فالسواقه..
لكنه رجع بعد دقايق يقول انه ما قدر يلحقه.
انتشر الهدوء بعد طلعة خالد وكانوا كلهم يطالعوني مو عارفين وش يقولون
كانوا مصدومين مثلي واكثر
وقفت ويدي على قلبي حسيت اني مخنوق وانا احاول استجمع القوه اللي باقيه فيني
قلت:
عذرا ياشباب متأسف على الفصل البايخ اللي صار قبل شوي, يالله انا ماشي...
سألني سامي بتردد واضح:
لحظه قبل ما تمشي يا بندر صحيح الكلام اللي قاله خالد؟!
هزيت راسي بأسى وانا امسك دموعي اللي عصتها شيمه الرجال
وبابتسامه رديت:
ليش استغرب منكم انكم تصدقون هالكلام فيني اذا كان خالد خوي الروح قدر يصدقه؟!!!! مع السلامه..
وطلعت
لحقني سامي...
خلني اوصلك للبيت يا بندر تراك على طريقي...
شكله حاس بتأنيب ضمير وراحمني وهذا اللي ما احبه
رديت...
لا مشكور انا بخير لا تشغل بالك...
وركبت السياره ومشيت.
فالبيت الوالده وريم كانوا فالصاله لما دخلت
واستغربوا رجوعي بدري..
بعد السلام سألت الوالده باهتمام:
بندر يمه وش فيك؟!...
ريم بعد قالت شي زاد الالم اللي في قلبي:
عسى ما شر يا بندر خالد فيه شي؟؟؟…
حاولت امثل اني معصب ..
انتِ ماتفهمين؟!! كم مره اقولك يارويم لا تتفاولين على العالم، يا جماعه كل اللي صار ان احنا تفرقنا بدري الليله عادي وشفيكم؟!...
قالت الوالده...
ياولدي وجهك متغير انا امك واحس فيك قلي يا امي من اللي مضيق صدرك؟!..
قالت ريم:
لا يكون متطاق مع واحد من العيال؟؟..
قالت امي..
وش دعوى ما تعودنا منك ياوليدي هالحركات؟!!
كنت عارف ان شكل ثيابي يدل على اني توي طالع من هوشه…
قلت لهم:
ريحوا بالكم تهاوشت مع واحد من الشباب بس جت سليمه خلاص عاد فكوني
قالت ريم:
اكيد بتجي سليمه اذا كان خلود المرعب ابو المشاكل هو اللي دايم يفزع معك المفروض محد يقرب لمك
هزت راسها كنها تذكرت شيء مو حلو...
يمه منه ذاك الولد شراني ياكثر ما صيحني وحسرني وحنا صغار،تذكرين يمه ذيك الايام؟!…
ابتسمت امي...
اول سنتين من نقلتنا للرياض ماكنت اربط شعرك دايم تجيني تصيحين من تمعيطه لشعرك..
قالت ريم..
وتضحكين بعد يمه المشكله ان ولدك ذا كان يطقني معه ما كني اخته الحمد الله والشكر...
قالت امي..
صحيح ان خالد كان شيطان وهو صغير بس والله ان الولد والنعم فيه شوفي وش صار الحين...
آلمني كلامها زياده بس سويت الوضع عادي ووجهت كلامي لريم...
وانتِ وش تبين ما عندك الا خالد وخالد؟! بعدين تستاهلين رازه وجهك عند العيال فالشارع دايم وهو معتبرك اخته...
حسيت اني احرجتها وردت..
انا والا انت اللي ما عنده الا خالد؟!!..
قطعت الحوار و رحت للغرفتي...

04-12-2010, 09:25 PM

[ 4 ]

قعدت في فراشي استرجع اللي صار
معقوله خالد يسوي معي كذا ويقول عني هالكلام, وبدون حتى ما يفكر وقدام هالعالم كلهم؟!!
لا اكيد انا احلم
اصلا اللي شفته اليوم انسان ما اعرفه !!!
ورغم الإهانه اللي كنت احس فيها والجرح اللي في قلبي الا اني دست على مشاعري ورحت ادق عليه لازم افهم وش اللي مضايقه لهالدرجه
ليش؟؟ لانه مو اي واحد
لكنه للاسف عطاني مشغول بعدين قفل جواله !!
جلست في بيتنا ثلاث ايام لا رحت للاستراحه كالعاده ولا استقبلت مكالمات من احد
حتى اهلي مستغربين
لكن لان طبعي كتوم ما قدروا يعرفون أي شي
كانت هاذي اول ثلاث ايام ما اشوف خالد فيها واحنا في نفس المكان
مرت علي كنها ثلاث سنوات
ورغم اللي سواه معي الا انه وحشني حيل واشتقت له ذاك الشوق اللي تحسه يوجعك مو بس نفسي الا تحس شيء يألمك من جد اذا فاهميني!!!
لكنه الله يسامحه ما حاول يعطيني أي فرصه عشان اتصل عليه
اتصلوا الشباب من الاستراحه وكانوا حاطينه عالسبيكر وسلموا علي وسألوا عن احوالي
عاد واحد منهم اسمه ماجد
قال:
وينك من زمان عنك يارجال كبر راسك علينا والا عشان خويلد ما عاد يجي صرت انت بعد ما تجي؟!
سمعت كان احد ضربه وسكته
المهم قلت:
معليش ياشباب انا هاليومين ما اعتقد اني بجي للاستراحه مالي نفس سامحوني..
قال سامي:
وشرايك نجيك للبيت اذا ما عندك مانع؟!...
استغربت بس رديت..
بالعكس حياكم الله أي وقت البيت بيتكم...
خلاص اذا شفنا يوم مناسب بندق عليك...
خير انشاءالله الله يحييكم أي وقت...
مع السلامه..
بعد شوي دق خالد !!!!!!!!
معقوله ماني مصدق عيوني وش القصه؟!
قعدت ساعه اطالع الأسم ابي اتأكد انه فعلا هو
لكن للاسف سويت شي بظل ندمان عليه طول عمري
عطيته مشغول وقفلت الجوال
ليش سويت كذا .. ما ادري .. اظن انها كانت ردة فعل طبيعيه بعد اللي صار لي معه
وما اعتقد احد يلومني
يمكن ابي ارد له اللي سواه
او كنت عارف لو رديت انه بيكون لي فضل عليه
وهذا اللي ما ابيه
المهم هذا اللي صار .. لكن الوضع استمر
صار يدق علي وانا ما ارد كنت اعاند قلبي قبل لا اعانده هو
صار يرسل مسجات يترجاني فيها اني ارد
لكن اللي فهمته من بعض المسجات
انه يبيني اسامحه لانه اكتشف انه غلط بحقي ومن هالكلام اللي خلى عنادي يزيد...
بعد يومين دق علي طلال اخو خالد الكبير
هو بعد صديق عزيز يجلس معنا من فتره لفتره فالاستراحه
وكنت اغليه من غلى اخوه واحترمه كثير ولا قدرت اصفطه
رغم اني عارف سبب المكالمه ورديت:
مرحبا طلال...
هلا وغلا وش اخبارك وعلومك يا بندر؟...
ابد والله تمام...انت أخبارك واخبار الأهل؟...
تسلم كلهم تمام, بندر ياخوي!!..
ســــم؟ ...
سم الله عدوك,
انا داق عليك عشان موضوع خالد
انا عارف انك ماتبي احد يتدخل فالموضوع حتى خالد مو راضي يتكلم
انا عرفت من الشباب وفكرت كثير قبل اكلمك لكني ماقدرت اشوف حالة اخوي كذا واصفط يديني, الصراحه من ذاك اليوم وهو مو خالد اللي نعرفه لا يروح ولا يجي ماعاد يسولف ولا يضحك حتى الاكل دايم ما يشتهي!! والوالده ضايق صدرها عليه تحسب انه زعلان على البنت
وتقول لاخواني وين بندر عنه محد بيوسع صدره الا هو!!،
صار طول الوقت في غرفته خاصه لما عرف انه مالك يد فاللي صار، وليتها جت على كذا خالد رجع يدخن بعد بس هالمره بشكل يخوف يا بندر...
قلبي انقبض بس رديت...
والله ياطلال انا مقدر موقفك وخوفك على اخوك
واعرف ان قلوبكم على بعض دايم وصدقني اخر شيء اتمناه ان خالتي يضيق صدرها وانت عارف زين اني اعتبرها امي الثانيه لكن انا ما غلطت معه ابد,هو اللي جاني ونسف كل شي حلو كان بيننا في لحظه غضب...
طيب ماتبي تعرف وش القصه وليش خالد سوى معك كذا؟..
مهما كانت القصه ما تعطيه الحق انه يسوي اللي سواه ترانا ماعدنا صغار وانا اخوك,بالله هاذي طريقه يعاملني فيها؟!!
والله اني ما شفته يسوي كذا مع الناس اللي كان يتهاوش معهم وهو مراهق،
خالد قدر يقول عني كلام يجرح بدون ما يراعي أي شي ويصدق فيني كذبه بدون حتى ما يعطيني فرصه ادافع عن نفسي...
تنهد طلال..
ياخوك اللي صار ان اهل البنت قبل لا نحدد الملكه رفضوا فجأة يقولون انهم عرفوا انه يدخن او على الاقل كان يدخن ولا عندهم استعداد انهم يجازفون ,ومن ضمن الكلام فهمنا ان اللي قالهم بندر
وانجن خالد لما سمع اسمك كان مصدوم وقعد يصارخ يقول كيف يسوي فيني كذا وهو وعدني؟!
وطلع وصار اللي صار
لكن اللي فهمناه بعدين انه طلع بندر ولد جيرانا
بس تبي الصراحه ما احد من اخواني جا على باله كلنا رحنا لك على طول لما سمعنا الاسم...
ضحكت بتعجب وانا اقول في قلبي
"هذا الشيء التافه هو اللي خلاك تظلم خويك يا خالد ؟!!"
رديت على طلال..
والله هذا مو ذنبي ولا هو عذر للي سواه معي خالد ظلمني وكسر في داخلي شي عمره ما يتصلح
والله انه غالي وانا مسامحه ياطلال ولا ابي شيء منه بس صدقني ما اقدر --
وحسيت اني ماعاد اقدر اكمل...
بنبره هادئه رد طلال..
على كلا انا حبيت افهمك اللي صار وانتم رجال وفاهمين وش تسوون وانا ما اقدر الومك على شيء بس هذا اخوي يا بندر ولازم احاول اسوي اي شي...
اعذرني ياطلال ياليتك جيتني في شي ثاني والله رقبتي سداده ...
اصيل ما تقصر يا بندر اشوفك على خير...مع السلامة...
لما عرفت التفاصيل ضاق خلقي زياده
كنت اتمنى ان الموضوع يكون اكبر
يعني معقوله يسوي كل ذاك الفصل عشان تشابه اسماء؟!
شي يحز فالخاطر صراحه صحيح ان خالد معروف عنه انه عصبي ولا يقدر يضبط نفسه بس هالكلام المفروض ماينطبق علي
على الأقل مو بهالطريقه اللي صارت!!
بأختصار حسيت اني مثلي مثل غيري بالنسبه لخالد...
فاليوم الثاني جت الوالده تصحيني الساعه10الصبح ...
يمه بندر اصحى خالد عند الباب...
كنت متوقع ان هالشي بيصير وحاسب حسابه ..
قولي له نايم...
قلتها وانا اغطي راسي بالبطانيه..
حاولت تسحبها من فوقي ...
يوه اقولك خالد عند الباب وش بلاك ياولدي...
على صوتي شوي...
عارف انه خالد سمعتك من المره الاولى وانا اقولك نااااايم...
تعجبت الوالده من تصرفي لاني اول مره اسويها
لكني ما عطيتها فرصه عشان تستفسر,
طلعت من غرفتي وانا نطيت من فراشي للشباك على طول
كنت اشوف سيارته لكن ماقدرت اشوفه حاولت منا ومنا مافي مجال.
صار يمر على بيتنا يوميا الظهر والليل وانا اتهرب منه واصرفه ولا عمري طلعت له
ودروا اهلي ان بيني وبينه شي اصلا واضح مايبي لها ذكاء
اما جوالي صار مايسكت
سواء مكالمات من خالد .. او من الناس اللي يحاولون يصلحون بيننا
ومسجات طول الوقت حتى اذا قفلته وفتحت الثاني او سوا كان يدق عليهم على طول
ما ادري العب على مين
هذا خالد اللي يعرفني زين ويعرف كل ارقامي
وحتى لو كان عندي رقم محد يعرفه فهالكلام ماينطبق عليه

04-12-2010, 09:26 PM

[ 5 ]

ذاك اليوم اشتقت له ورجعت بي الذكريات لايام الابتدائي
وياكثر المواقف اللي حصلت لنا
لان اللي يصادق واحد مثل خالد تتحول حياته لمغامره
مره في الصف السادس اذا ما خاب ظني
كان الاستاذ مسوي مسابقه اللي يفوز بيصير"العريف" اللي ينظم الفصل اذا ما كان الأستاذ موجود..!!
والله ايام وحشتني
المهم انا كنت ميت عشان اصير هالعريف
اجي بدري، واشارك، وصاير مؤدب"ثقيل دم على قولة خالد"
كان مايحب الاشخاص اللي مثلي يهتمون بالدراسه ويحبون المدرسين او يتمصلحون عندهم على قولته
بس سبحان اللي جمعنا مع بعض
كان يقول...
ليش تبي تصير عريف؟!! ترى العيال بيكرهونك..
ما اهتميت لكلامه ورديت..
ابي اصير كيفي!! بعدين يا غبي بخليك تطلع وتدخل على كيفك..
لا مو لازم انا اسوي اللي ابي حتى لو ماكنت انت العريف...
المهم قبل لا يختار الأستاذ بيومين شريت بلونات وجبتها للمدرسه
خالد كان مريض و غايب
بس انا والشله رحنا ومليناها مويه واول ما انتهى الدوام رميناها من فوق وانحشنا
يمكن بتقولون وين الولد المؤدب
لكن انا بعد خالد صارت تجيني طلعات
توقعت الموضوع محد بيدري عنه
لكن من بكره اول ما جيت الصبح
قالوا لي العيال
ان الأستاذ يسأل عن اللي جاب البالونات وسوى الحركه اللي امس
هنا انا قلت على العريف السلام
هالاستاذ مايصدق
رحت لخالد اللي متجمعين عليه كل العيال
بما انه كان غايب امس
علمته باللي صاير وهو يدري انا وش سويت امس لاني قلت له السالفه واحنا جايين للمدرسه
قال
خلاص ولا يهمك انا اتفاهم مع الأستاذ
كنت اعتمد عليه كثير
لما بدت الحصه دخل الأستاذ وبنبره كانت تخلينا ننتفض..
اللي رمى البالونات امس يوقف..
محد رد فالبدايه
كان ماسك مسطره وش كبرها الله يسامحه...
شوفوا لو ما تكلمتوا بعاقب الفصل كله...
ناظرت خالد وانا بموت من الروعه
ابتسم وغمز لي .. بعدين وقف ...
انا يا استاذ...
قالها كنه محرر القدس!!
قرب الأستاذ من عنده وسحب اذنه...
والله اني عارف انه ما في غيرك يا خالد يسوي هالحركات، انت متى بتعقل ليش ما تصير مثل اخوانك او مثل صديقك بندر جننتني معك ياولد!!...
الصراحه ما توقعت ان خالد بيتحمل اللي صار بدالي؟؟!
فعلا كنت مستغرب والدليل اني قاعد اتفرج وهو يتعاقب وانا ساكت!!
طبعا الأستاذ كسر المسطره على يدينه يا حرام
وانا احس ان عقلي بيطير من المنظر
بعدين وداه للمدير...
في نفس الحصه اختارني الاستاذ عريف
وطبعا ما تهنيت فالخبر
لاني ما ادري وش صاير مع خالد ذاك الوقت..
لما انتهت الحصه كان واقف قدام غرفة المشرف وحوله بعض الاولاد
يوم شافني ركض ولمني...
احلىىىىىىى اخيرا وصلت اللي تبي مع وجهك...
انا ما كنت اقدر اتكلم
اشوف يدينه حمر من الطق ويفركها على جسمه ووجه الاسمر تخالطه حمره بسبب المرض
وهو يضحك...
قلت وانا متنرفز يمكن من الأحراج...
خالد ليش سويت كذا انا ما قلت لك —
قاطعني...
يا بن الناس يعني اول مره انطق خلاص مشها يالله لازم نحفل اليوم...
من بعد اللي صار عمرنا ما تكلمنا عن هالسالفه
شكله نساها او ما اعتبرها شيء
بس عمري ما نسيت
صحيح اننا كنا صغار لكن فزعته هاذي لا يمكن انساها...
هالذكريات شوقتني له
و رحت اتفرج على صورنا وعلى اشرطة الفيديو
عجبني كيف كنا مره قريبين من بعض ولا في مكان يطلع فيه واحد الا الثاني جنبه
اغلب الاشرطه ما قد شفتها من قبل
كانو حوالي العشرين شريط شي لسفراتنا وشي لطلعات البر
وكلها شفتها في يوم واحد ورى بعض
اكتشفت اني طول الوقت اطالع فيه هو
حتى فالصور عيني عليه بس
وطوال وقت عرض الاشرطه وانا اضحك عليه
كان بطبعه خفيف دم
محد فهالدنيا يخليني ابتسم او اضحك اوحتى يجنني مثل ما يسوي
واحد من الاشرطه كان فيه مقطع اثر فيني كثير
كنا مخيمين فالصمان
واحد من الشباب يصور ومعه خالد
مروا على اغلب الشباب اللي ينصبون الخيام واللي ينزلون الاغراض
وخالد كان ماخذ دور المقدم عشان يتهرب من الشغل كالعاده
هو واللي معه وقعد يسوي مقابلات معاهم ويستهبل عليهم
وانا اضحك طول الوقت على طريقه كلامه وتعليقاته
لما جا دوري كنت قاعد اشب الفحم ومعطيه ظهري
قرب مني...
عاد جينا الحين لاغلى انسان...
كنت مشغول باللي معي...
هلا هلا خلود,مسوي فيها مذيع يعني؟!!ما ودك تساعدني بدال هالخرابيط ازعجت العالم ياعمي...
كان يوجه كلامه للكاميرا وحاط يده على ظهري وانا مو معطيه وجه ...
هالولد اللي تشوفونه عرفته من يوم احنا صغار عزيز وغالي علي ولا ابدله بكنوز الارض...
قاله اللي يصور:
ما اقدر انا على هالكلام!! يا بعدي هاللي انت كاشخ فيه وتمدحه من الصبح حتى ما عطاك وجه وانت تتكلم...
طالعني بنظرات ما انتبهت لها ذاك الوقت
كانت تحمل معاني حلوه...
كمل كلامه..
ولله لو ايش يصير ما يتغير شي من غلاه...
تجمعت الدموع وانا اسمع كلامه مع اني ذاك الوقت واضح اني ما انتبهت لـ أي كلمه
جتني مشاعر متضاربه
كنت اقول في نفسي "كلام رائع لكن ماطبقته ياخالد باللي سويته فيني"
سكرت الفيديو ورحت انام
او بالاصح احاول انام.
يوم الثلاثاء رجعت للبيت متأخر
ولما وصلت عند الباب شفت سيارته
كان يستنى داخلها والله وحده اللي يدري من متى
وعلى ما يبدو لي من طريقة قعدتة وتكتيفة يدينه انه نايم
لأن راسه مايل على جنب بس شكله متغير مره!!
اول شي لحيته بدت تطلع,شعره تركه يطول بدون ما يرتبه وهاذي مو عادته ابد
واضح ان جسمه ضعف يعني كأنه واحد توه طالع من السجن...
وقفت سيارتي
لكنه ما حس
ما ادري وش اللي خلاني اصفق باب سيارتي بقوه عشان ينتبه ..
يمكن ما كنت ابغى انتظاره يطول
فز من نومته و نزل بسرعه ،ناداني وصوته تخالطه بحه واضحه،
وخالد من النوع اللي صوته يروح بسرعه اذا صارخ او اذا صار مريض
حسيت بتعبه
لكني ما التفت له وسويت روحي ما اسمع
ودخلت للبيت
الرجال قعد يطق الباب زي المجنون
لدرجه اني خفت يصحي الجيران ويفضحنا قدام العالم
وانا واقف عنده من داخل منزل راسي واسمعه ...
افتح يابندر خلني اكلمك الله يعافيك لا تسوي فيني كذا يابندر...
كان كل مره ينادي فيها باسمي بصوته اللي مره تسمع الكلمه ومره ماتسمعها اتألم
بس من جد ما ادري وش قوة القلب اللي جت لي فجأة وخلتني اتماسك ولا اطلع له
كل ما مر الوقت زاد عنادي
بعد فتره سمعت صوت جسمه ينسحب على بابنا كنه يقعد فالارض
رحت اركض بافتح الباب خفت انه صار له شيء
لكن سمعت صوته يكلم نفسه لانه توقع اني دخلت داخل خلاص...
سامحني يا بندر انا اسف والله اسف ...
وانا اسمعه كنت كني اسمع اعتذار من طفل متأكد ان اللي قدامه ماراح يسامحه
جلست على الارض وحطيت راسي بين يديني وسندت ظهري للباب من داخل
وانا افكر في نفسي"معقوله اللي قاعد يصير معنا يارب؟!!"
والله دنياغريبه،
وجلسنا ساكتين،
بعد فتره سمعته يتحرك ويركب سيارته
بعد يومين جاني واحد من ربع الثانويه اسمه نواف
كانت علاقته قويه مع خالد
والى الحين وهم ربع
بس هو مو من شلة الأستراحه
ابتسمت اول ماشفته تذكرت على طول هباله هو وخالد ايام كانوا يرقصون سامري فالصف كانوا اجرأ اثنين
وكيف جتهم تهزيئه من المدير خلتهم ينسون الرقص كله
وسبحان الله وشلون تغير هالنواف وصار شيء ثاني رغم ان خالد لازال على جنونه...
ماقال شيء عن الموضوع
لكن جيته صدقوني كان لها اثر في نفسي
ذكرتني بأشياء كثيره
واظن ان هذا مقصده من الزياره

04-12-2010, 09:28 PM

[ 6 ]

جاني مسج من خالد فاليوم الي بعده
وكان مقطع من اغنيه تعجبنا ودايم نرددها
يقول المسج:
*ما جيت ابسأل جروح او سبه غيابي..
المشكله"اعرفـــــــك" اكثر من أسرارك..
وأكثر من جــــــــــــروح قلبي ورقه اعتابي..
((قلي بعد هالـــــفراق وش آخر اخبارك))؟؟!!
المسج اثر فيني .. لان خالد مو راعي مسجات ولا يعترف فيها
رجعت بي الذكرى لايامنا الحلوه
وقررت ارسل له مسج كرد من نفس هالاغنيه بعد بتعديل بسيط مني:
*ماهي غريبه اذوق وانطفي بنارك
ولا هي بعيده اشوف الجرح باحبابي
حاولت أنسى ولكن ضاعت اعذارك
مادام جرحك ((يالرمت))مكتوب بكتابي!!
يوم الخميس اتصل سامي:
هلا بندر...
فرحت بمكالمته ذكرتني بالجمعات فالأستراحه...
هلاااااااااااااااا سامي وش الاخبار...
تسلم, وش دعوى يارجال وين الناس اشتقنالك...
تشتاقلك العافيه ياخوي...
فاضي اليوم نمرك انا والشباب بين عشوين؟...
الساعه المباركه حياكم الله والله ودي بشوفتكم...
اجل نشوفك اليوم انشالله...
لا تطولون صلو في مسجدنا مع السلامه
جو الشباب على موعدهم .. على انهم ما صلوا عندنا
ورحت افتح لهم
ماشاء الله كان الكل جاي
ما ادري وش الغلا اللي جا لي فجأة
ولما اكتملت المجموعه وانا ارحب فيهم
قبل لا اسكر الباب دفعه واحد
فتحته بسرعه وقبل ما اشوف مين قلت..
السموحه ماشفتك يـــا...
كان خالد!!!
ما عرفت وش المفروض تكون ردة فعلي
لما تلاقت عيوننا بعد كل هالغيبه حسيت كني بطير من الفرحه في داخلي
وانا احاول بكل ما اقدر اني اخفيها واني ما انط عليه واحضنه
ابتسم ذيك الابتسامه الحلوه واللي وحشتني حيل
وهو زي ماتقولون كنه واحد غرقان ورد النفس...
فتح يدينه عشان يلمني
لكني بكل جمود مديت يدي وصافحته بدون أي كلمه!!
قبل لا يصير في خاطركم شيء علي
تذكروا اللي سواه فيني
وش ممكن تكون ردة فعل اي احد فيكم
فالأخير احنا بشر ولنا مشاعرنا وانفعالاتنا اللي مو دايم لها تفسير ولا نقدر نتحكم فيها مهما كانت مكانة الشخص بالنسبه لنا..
الشباب سبقونا للمجلس
اصلا كان واضح القصد من هالزياره اكيد خالد هو اللي جابهم كلهم
توجهت للمجلس لكنه سحبني من ذراعي ناحيته بقوه
وبصوت هامس يحمل كل معاني الندم والرجا...
معقوله ما وحشتك؟!!..
مارديت عليه وكمل كلامه...
لمتى يا بندر بتظل تتجاهلني, كلمني رد علي,هزئني اوحتى اضربني انا راضي واستاهل لكن لا تسوي فيني كذا حرام عليك والله اني تعبان وفهمت غلطتي وعارف اني ما اقدر اعوضك لكن هالعقاب والله فوق طاقتي يكفيني يا بندر انت بالذات تدري اني مالي غنى عنك...
كان قلبي يقول لي...
ياخي خذه بحضنك وانسوا كل هالالم لكن الله يلعن ابليس ,العناد والكبرياء سيطروا علي والموقف اللي صار فالاستراحه بين عيوني
قلت بكل برود وانا ابعد يدينه عني بهدوء...
جعل يدي تنقص قبل يجي اليوم اللي تنمد فيها عليك ماضربتك وحنا صغار تبيني امدها الحين؟!!
"كانت نغزه على حركة الأستراحه"
يالله الشباب ينتظرون داخل...
نزل راسه بانكسار ودخلنا
واضح انهم كانوا يحاولون يلقطون شي من الحوار اللي دار بيننا
لكن اول ما دخلت كل واحد التفت على الثاني وسوى روحه متعمق في سالفته
بديت اصب القهوه
ومسك خالد الدله الثانيه
كانت هاذي عادتنا لما يزورني احد
دايم نفزع لبعض
بس هالمره ماكنت ابي أي مساعده منه
واللي زاد قهري ان خالد باللي صار خلانا فرجه لخلق الله ومحل شفقه الجميع
وهذا اللي ماكنت استحمله..
قلت لماجد اول واحد بصب له بصوت واطي وانا اضغط على اسناني..
رح قله يترك الدله ومشكور ما نبي منه شي...
كملت صب وسمعت ماجد يقول لخالد اللي بدى يصب من الجهه الثانيه :
هات الدله عنك...
لا استرح تسلم انا ابي اصب مع رفيقي...
وشدد على اخر كلمه يبيني اسمع...
لكن بمزحه بايخه وقاسيه في نفس الوقت يرد ماجد:
هذا اول يالحبيب زين انه سمح لك تدخل لبيته معانا هات عنك بس...
وقعد يضحك..
حسيت انه جرحه وتعمد يهينه
ولولا اني حكمت عقلي ذيك اللحظه وتذكرت انه في بيتي كان صفقت وجهه بالدله اللي معي
صحيح ان ماجد كان معروف عنه انه انسان فظ وعربجي ومزحه زي وجهه ولا يثمن كلمته او حتى يفكر فيها قبل يقولها
لكن لو في ظروف غير هاذي الله العالم وش كنت بسوي فيه...
هذا اذا ما أدبته اول مايطلع خالد
ادري انكم تقولون طيب هذا اللي انت تسويه مع خالد
بس ما ادري اذا قد جاكم هالشعور
انه ممكن اجرح او ازعل انسان غالي علي
بس لو احد ثاني حاول .. يفور دمي و اعصب!!!.
المهم سويت روحي ما سمعت وكملنا صب,جلسنا, اللي يسولف واللي يضحك كنه ماصار شيء
الا انا وخالد
كنت امر بعيوني عنده كل شوي
ولأني افهمه من عيونه وبدون أي كلمه
عرفت انه ينتظر الشباب يمشون
اذن العشاء وقاموا الجماعه
الا خالد
وكنت متوقع هالشي بعد
ودعتهم وشكرتهم على الزياره
عند الباب قال لي سامي بيني وبينه:
والله انكم مفضوحين .. الغلا واضح بينكم .. حتى لو حاولتوا تبينون العكس .. والله الله في خالد وانت عارف اكثر مني انه مافي مثله .. انت العاقل ولا تغلط غلطته .. انتم بدون بعض اسمح لي ما تسوون شي , ولا تخلون شي تافه يهدم احلى صداقه شفتها في حياتي , اصلا والله يا بندر انه يحز في نفسي اني اوصيك عليه وانتم اللي من اول نخاف نقول شيء عن واحد منكم قدام الثاني...
شكرته وقلت..
قلبي ياسامي ما يزعل وانت تعرف خاصه على خالد بس الأمور احيانا تطلع من يد الواحد والله يخليك لا تفتح معي الموضوع مره ثانيه تراه علي اصعب مما تتخيلون..
مع السلامه..
ودعته
ولما التفت لقيت خالد واقف عند الباب الداخلي ينتظرني
قربت عنده بدون أي كلمه
وكتفت يديني
بدى بالكلام على طول...
بندر سامحني يااخوك ترى كل هاللي قاعد يصير ماله داعي, انا تهورت وقلت كلام ماكان لازم اقوله, وجيت اليوم اعتذر لك واحب راسك بعد,"تكفى" خل عنك العناد وريح بالي ترى ما صارت المسامح كريم يالغالي...
سكت فتره اول مره اسمع تكفى منه
كانت طالعه قويه منه
لكني حاولت اختار كلماتي قبل لا اقوله شيء..
آسف يا خالد صدقني ما اقدر انت حطمت كل الاشياء الحلوه لك في داخلي بعد ما سمعتني ذاك الكلام والا نسيت؟!! اذا انت نسيت تراي اذكر كل كلمه قلتها وتتردد في بالي كل يوم, ذاك الكلام اللي زي السم واتهمتني باطل بعد بدون ما تحسب لصداقتنا أي حساب,يا خالد انا للحين احس اني في حلم مو قادر اصدق اللي صار, انت من بد كل هالعالم تبيعني انا في لحظه؟!! ما كان العشم والله...
وبصوت مليان الم ...
يعني ايش يا بندر 16 سنه صداقه معقول ما قدرت تلقى لي لحظه وحده تشفع لي عندك وتخليك
تسامحني؟؟؟!!..
بعد كلامه انهمرت الذكريات من كل جهه
لكني حاولت اتجاهلها بكل ما اقدر
وانفجرت...
اسأل نفسك قبل لما اهنتني قدام البشريه بدون ما تعطيني حتى فرصه اني ادافع عن نفسي انت يا خالد حتى ما حاولت انك تظن فيني خير وبعتني بسهوله , نسيت كل شي يا خلود, نسيت اللي اذا ضاقت بك الدنيا يصير لك الدار ويضيق خلقه لين تنفرج عليك, ونسيت اللي صانك وحفظ اسرارك طول عمره، نسيت اللي ما يرضى احد يغلط عليك وانت بكل بساطه تجرحه وتظلمه وتحرجه قدام الكل, ياليتك قدرت معزتي ومحبتي الكبيره لك,
حركت يديني بعصبيه...
يا خساره يا خالد انا بس ابي اعرف ذنبي, قلي ليش سويت معي كذا؟؟! عمري غلطت عليك بكلمه؟ او حتى ضيقت خاطرك بحركه؟ تجرحني بهالسهوله ليه؟ علمني يا خالد لا توقف ساكت تكلم يا اخوك؟!! المشكله هنا ان الغلطه جت من غالي وهذا اللي يخليني ما اقدر امشيها...
عضيت على شفتي وانا اشوف ملامحه تتغير...
تجاهلته وكملت...
تدري وفر علي كل الكلام اللي بتقوله لانه ما عاد ينفع شي الحين اللي انكسر ما يتصلح ما عاد لك بقلبي مكان ليتني ما عرفتك يا خالد...
كنت اقول هالكلام عشان ارد له اللي صار فالاستراحه
وداخلي يصرخ...
يا مكبر كذبتك يا بندر انت لو احد سألك وش دنيتك مايجي في بالك الا أهلك وخالد...
سكتنا شوي وخالد يهز راسه وعيونه تتلامع
والف صوت في داخلي يقول له:
تراي مثلك يالغالي عزيز وداخلي منهار, وعشان انهي هالمشهد الحزين قبل لا اضعف قدامه
قلت:
في بيت شعر سمعته مره وما اظن ان معناه وصل لي او يمكن المشاعر اللي وصفها الا اليوم:
الجرح لا جــا من اغـــراب عــــــــــــادي
بس الجرح مـوت الجرح لا جا من احـباب
لا جا من احباب يا خالد وانت ياخوي ما قصرت كفيت ووفيت معي فهمتني البيت بطريقه ما اظن الا متأكد ان ما احد يقدر يوصلها مثلك, ما ودي اقول اني نادم على الماضي لاني فعلا ما ندمت لكنك خيبت ظني فيك...
رفع راسه وقرب يده من اذنه من قسوة الكلام اللي سمعه...
كافي يا بندر كافي انا عارف انك دايس على قلبك وانت تقول هالكلام، فإذا كنت تبي تثبت لي شي او حتى
لنفسك صدقني تراك اثبته, واذا كنت تحس انك مخدوع فيني او مصدوم فأنت الحين بأصرارك على الزعل تسوي مثلي ومهما صار او بيصير ترى غلاك في قلبي هو الاول دايم وعشرتك عمرها ما تهون عندي, وبالنسبه لك انا اكثر انسان فاهمك في هالدنيا عشان كذا بصبر عليك شوي لكن ما راح استسلم
وعارف انك مهما تقسى وتبعد طيبتك وحنية قلبك بترجعك لخو يك, وعارف بعد اني ما اهون عليك...
همست وعيوني فالأرض:
وش اللي يخليك متأكد لهالدرجه؟! مثل ما هنت عليك في يوم بتهون علي اليوم !!...
طالعني بنظره يائسه وحزينه...
الله يسامحك يا بندر والله ما اظن انه يفرحك انك تجرح خويك بهالطريقه...، اذا كنت قادر تنسى وتلغي احلى سنوات من طفولتك وشبابك فانت بتقدر تنساني اما بالنسبه لي فانا ما اقدر استغني ولو عن
لحظه من ذكريات عمري معك لاني ما اقدر انسى حياتي كلها ...
رديت بسخريه
واللي سويته فالأستراحه وش تعتبره؟؟مثل مانسيت اللي بيننا بسوء ظن انا نسيته بهالجرح، و ادري انك ماتستحمل فكرة ان اي احد يزعل منك لكن انا--...
قاطعني...
يا بندر انت مو اي احد وراك تكلمني كذا؟! فتح عيونك تراي خلود...
فعلا انا مو اي احد والدليل سواتك فيني...
ابتسم بألم...
لا حول ولاقوه الا بالله ما توقعت العناد يوصل فيك لهالدرجه، على كل حال الموضوع الحين صار في يدك وتقدر تحكم فيه بالطريقه اللي تبي بس اتمنى انك ما تسوي شيء تندم عليه، ولا تغالط نفسك اكثر من كذا انت تعرف من انت بالنسبه لي وهالعالم اللي حولي بدونك ما ابيهم وما اقدر اتخيل ان
اللي كان بينا بيكون ذكرى في يوم من الأيام انت متخيل هالشيء وانت تقول هالكلام؟!!...
هزيت راسي...
محد يموت قبل يومه الدنيا كذا والحمدالله على نعمة النسيان...
اقامة الصلاه..
وودعنا بعض وطلع

أنتظر آرائكم وردودكم ..
طيب كيف الدموووووع * _ *

04-12-2010, 09:29 PM

[ 7 ]
بعد هالموقف حسيت براحه كبيره
حسيت ان احنا متعادلين الحين
او يمكن كان سبب الراحه اني تكلمت معه بعد فتره اعتبرها في نظري طويييييله وطلعت كل اللي في خاطري
اصلا ما عاد فيني صبر على فراقه
واكيد انه حس بغلطته
وهذا اللي كنت ابيه
وقررت اني انسى اللي صار خلاص و ارد عليه اذا دق المره الجايه
واسامحه واطلب منه يسامحني بعد
يعني حتى انا قلت كلام ما كان لا زم يطلع مني
وقررت ان احنا نسافر بعد
عشان نعوض كل الايام اللي بعدناها عن بعض
علمت ريم بالسالفه كلها
كانت مستغربه وهي تسمعني:
تصدق يا بندر هاذي والله العالم عين وصابتكم اجل معقوله خالد يسوي اللي سواه لا والأغرب انك قويت نفسك ولا سامحته,لا لا اسمح لي هالكلام ما يدخل العقل..!!
..ضحكت وانا اسمعها وقلت...
من جدك ما سامحته؟؟!! اصلا من اول ما شفت اسمه في جوالي سامحته على طول وبيني وبينك قلبي ما قوى يزعل عليه من الاصل لكن الظاهر اني كنت امثل على نفسي قبل لا امثل على احد!!
ثانيا المسأله بأختصار كانت رد اعتبار, لكن تعرفين حنا مو زيكم انتم يالبنات اذا زعلت وحده الثانيه تعتذر على طول غالبا والثانيه بعد تسامح بسرعه وهذا في ظني اللي يخلي صداقات البنات اجمل واطول بعد اما الشباب فالكرامه والعزه تتغلب على العواطف الثانيه دايم نحس ان احنا مو بحاجة احد والاعتذار بعد من اصعب الاشياء علينا هاذي طبيعتنا اللي حطها ربي فينا, هذا وانا وخالد نعتبر طفره جينيه بالنسبه لصداقات الرجال ،الله يعين انشاءالله انا الحين بس استناه يدق خلاص ماعاد فيني صبر...
طالعتني بتعجب...
والله انك غريب يا بندر طيب ليش ما تدق انت عليه؟!!...
اوووه انت غبيه والا تتغيبين وش قاعد اتفلسف عليك من الصبح, اقول لك ما اقدر صعبه علي وبعدين خلود ما يقدر يصبر بعد اكيد بيدق هو قال لي انه بينتظر علي شوي...
عطتني نظرات ما ادري وش تبي وقالت..
الحمدالله والشكر لحد يسمعك بس وبعدين لا تسوي روحك فاهم البنات لانك ماعندك سالفه وفي شيء
ابيك تفكر فيه تتوقع لو الوضع كان العكس خالد كان بيسامح والا بيسوي مثلك؟!!..
وطلعت...
وقعدت افكر في كلامها واللي اجابته كانت واضحه بصراحه
وهي بعد كانت تعرف الاجابه لان مواقف قديمه تبين ان خالد حتى لو كان صعبه عليه يسامح ومن النوع اللي زعله شين بس انه يسامحني انا دايم مهما صار..
لكن هالكلام مايهم الحين..
مر كم يوم وخالد للحين ما دق
لكني يوم الأربعاء شفت ميه مس كول من طلال
ورجعت ادق عليه
قلت اكيد ان خالد يبيه يتوسط بيننا لانه يعرف معزة طلال عندي
لما فقد الامل فيني
وبعدين اناخلاص وصلت عندي ابي كل هالسالفه تنتهي
ودقيت وانا فرحان...
مرحبا طلال...
هـ...هـ لا.. بندر..
صوته ابدا ما عجبني واختفت الأبتسامه...
طلال خير انشاءالله عسى ماشر,معليش ماكنت عند الجوال قبل شوي بغيتني في شي؟!...
الرجال بدى يتنهد وحسيت ان في شي مو زين صاير ...
بندر انا لي ساعه احاول ادق عليك لكن ----....
طلال ياخوك لا تلعب باعصابي قلي وش فيكم؟!...
انا ذاك الوقت الهواجس لعبت فيني لعب قلت ابوهم توفى لانه كان رجال كبير فالسن ومريض من زمان والا اخوهم الصغير تركي اللي كان عنده ربو حاد جاه شي
كل شي مر في بالي وكنت طول الوقت افكر بس في خالد
وشلون بيتقبل هالاشياء
وانا اعرف غلا ابوه واخوانه عليه
وعزمت اني انسى كل اللي صار و اوقف معه في محنته
كل هذا قبل لا ينطق طلال بحرف ...
خـالـد يا بندر-----!!
لما سمعت الاسم حسيت ان قلبي وصل حلقي
ولا عاد قدرت اتكلم او حتى اتنفس
وبصعوبه...
خـ-خـ--الد وش---فيه حراااااام عليك تكلم؟؟!!
كنت انتفض وركبي ما عاد تشيلني...
خالد يطلبك الحل يا بندر ادع له بالرح---
وخنقته العبره
اما انا فكنت ساكت
ولاعاد اشوف شي قدامي قعد يتكلم كلام ما فهمت منه شي اللي قدرت استوعبه انه الظهر صار له حادث والظاهر انه كان متوجه لبيتي وتوفى فالمستشفى...
قفلت الجوال
كنت واقف وبحركه بطيئه قعدت على الارض
وبعدين انسدحت عالأرض وقعدت اناظر السقف لفتره طويله
ويدي على راسي
فقدت الاحساس بكل اللي حولي
لا دموع ولا كلام ولا صدر مني أي ردة فعل..
طلعت بسيارتي امشي فالشوارع بدون هدى
ما وعيت الا انا فالمجمعه ديرة خالد اللي تبعد عن الرياض حوالي الساعتين
وياما زرناها سوى
وقفت السياره قدام فلتهم اللي يجونها ايام الشتاء
لما جا الليل رجعت للرياض..
دخلت البيت ورحت لغرفتي
وقعدت اتقلب في فراشي
تصوروا كل هذا بدون أي احساس
الظاهر اني ما كنت مستوعب المصيبه اللي انا فيها
لما جا الصبح رحت لبيتهم على طول
وقبل اوصل دق علي طلال...
الو...
هلا بندر, اذا ودك تسلم عليه وتودعه قبل الدفن تعال للمغسله اليوم قبل صلاة العصر..
ما رجعت للبيت
رحت للمغسله وسألتهم
قالوا ما بعد وصل من المستشفى
تبون الصراحه
كان للحين عندي امل ان السالفه كذب او فيها غلط زي حال الكل وقت المصايب
ماودهم يصدقون
واني بشوف خالد بعد شوي
قعدت عند الباب الى الساعه 2,30
والا اشوف سيارة اسعاف جايه ووراها سيارات اخوان خالد كلهم
وقف الأسعاف وفتحوا الباب الخلفي
شفت طلال وباقي اخوانه عند السياره
لما شفتهم يطلعون طرف شي ابيض شهقت ورحت اركض فالشارع
كنت احاول ابتعد عن المكان بقد ما اقدر
مشيت لين وصلت اخر الشارع
وجلست على رصيف واحد من البيوت
لما هدت نفسي شوي رجعت للمغسله
كان لازم اواجه

04-12-2010, 09:29 PM

[ 8 ]
دخلت وانا شماغي على كتفي وماسك عقالي في يدي وحالي دمار
لقيت مو بس اخوانه حتى اعمامه واخواله وزوج اخته بعد
الكل كان متواجد
لما شافوني تغيرت وجيههم وحضنوني بحراره
كلهم اعرفهم ويعرفوني زين
عرفت اني ذكرتهم فيه لما شافوني
حتى واحد من اخوانه ما رضى يتركني
كنه بتعلقه فيني يحس انه مع اخوه خالد
والغريبه انهم كانوا يعزوني بدال ما انا اعزيهم
المهم جاني طلال وعلامات التاثر باينه في وجهه..
تبي ادخل معك؟؟؟احنا تونا طالعين...
قاطعته...
لا لا بدخل لحالي...
كانت هاذي اول جمله انطقتها من اول ما دخلت للمغسله
حتى لما عزوني ما رديت عليهم..
تعوذت من ابليس وبديت اذكر الله
و دخلت في الغرفه اللي دلوني عليها
كانت فيها روايح غريبه
الريحه اللي قدرت اعرفها هي ريحه المسك والصابون
الظاهر ان الرجال اللي كان فالغرفه هو المغسل
وقفت في مكاني عند الباب
ماكنت عارف وش اسوي؟!!
قرب جنبي و كان شخص يميل للقصر ,ابيض, لحيته طويله وصاحب ملامح سمحه
حط يده على كتفي وحس بالرعشه اللي تهزني كنت اطالعه بنظرات استغاثه...
وبصوت وقور قال...
عظم الله اجرك ياولدي واحسن الله عزاك ,الله يلهمكم الصبر والسلوان, قبّل جبهته وادع له
بالثبات عند السؤال, وباللي يجي في بالك...
كنت اطالعه وانا اشهق بدون دموع وطلع من الغرفه..
شوي شوي قربت من عنده وشفت منظر في حياتي ما مر علي مثله
حسيت الدم وقف في عروقي لما شفته
انهارت كل حصون المقاومه والصبر اللي بنيتها
ما ادري وشلون اشرح الوضع
كانوا حاطينه على شي زي الطاوله ومرتفعه عن الارض بمسافه قليله
مغطين جسمه بشراشف بيضاء
الا وجهه وجزء من صدره
كانت عينه وجزء من جبهته متحوله للون الازرق من فعل الصدمه
اما خده ورقبته كانت فيها جروح بسيطه
لكن واضح ان تركيز وقوه الصدمه كلها جت على صدره
كان زي اللي نايم بس بدون أي اثر للحياه
والظاهر اني ما صدقت الخبر لين شفته بعيوني
فقدت اعصابي في ذيك اللحظات وصرخت صرخه مريعه
حضنته بين يديني وقعدت اصيح بحرقه زي الاطفال
دخلوا علي بعض اخوانه يوم سمعوا صوتي
وحاولوا ياخذونه مني لكني كنت متمسك فيه بقوه..
يا بندر قل لا اله الا الله لا تسوي في نفسك كذا ترى ما يجوز...
وانا اصرخ من كل قلبي احس اني فقدت عقلي للحظات...
اتركوني خالد يا اخوك رد علي , كلمني يا خالد ,طلال خالد ليش بارد؟؟ليش تاركينه كذا؟؟ ليش ماغطيتوه؟؟ حرام عليكم...
نزل راسه وانسابت الدموع من عيونه...
انا الله وانا اليه راجعون...تعال معي يا بندر تعوذ من الشيطان وخلنا نطلع...
وانا احاول اكلمه..
ياخوك وين رحت وتركتني؟!!انا من لي غيرك يا خالد؟؟..
ودموعي سيول واخوانه يحاولون يفكون يدي عنه..
وبعد جهد قدروا ياخذونه من بين يديني بعد ما بين اثر ضغطي على جسمه
وانا منهار وفي حال مايعلم فيها الا الله سبحانه
كل لحظه انادي بأسمه..
جابوا لي كرسي وقعدوني عليه وانا كني معهم ومو معهم...
واحد من اخواله شيخ كبير
من الناس اللي فيه خير وصلاح والله هاديهم
قعد يمسح على راسي وصدري ويقرى علي قرآن لين هدت نفسيتي شوي
ناظرت فيه...
خالد صدق راح يا خال؟!...
شد على يدي وهز راسه ورجعت دموعي ويدييني على راسي وانا اهز على الكرسي..
مايصير يا خال والله ما يصير...
قعد يستغفر وانا على حالي
كنت مفجوع الله لا يفجعكم في حبيب...
رحنا نصلي عليه كان المسجد مليان واللي برى اكثر من اللي داخل
كان الله يرحمه رغم صغر سنه انسان محبوب من الجميع صغار وكبار
وفي المقبره
مع الزحمه وكل هالعالم اللي حولي الا اني حسيت بوحده رهيبه
كنت بعيد عن الجماعه
ما ابي احد يعرفني او حتى يشوفني رغم اني عارف ان الكل يسأل عني
تلثمت بشماغي ولبست نظارتي الشمسيه
ووقفت بعيد عنهم
جاني تركي
واللي كان له غلا كبير عند خالد بحكم انه الصغير
وكان دايم يقول انه رغم صغر سنه الا انه كان حكيم ويفهم اكبر من عمره بكثير
كان عمره تقريبا ذاك الوقت12سنه
سلم علي وحضنته
وانا احاول اتماسك قدامه ولكم ان تتصورون مقدار صعوبه الأمر
خاصه انه يشبه خالد كثير
قال لي:
بندر خالد كان يعزك اكثر من أي واحد في هالمكان وكلهم مجتمعين حوله الا انت!! لا تتخلى عنه في هاللحظات عشان ما تندم باقي حياتك, تشجع وادع ربي انه يصبرك بس لا تحاول انك تهرب من احزانك بهربك من هالموقف...
كانت كلمات عظيمه اثرت فيني
وشفت في هالطفل اللي فقد اخوه في حادث مفجع الصبر بمعناه الحقيقي
لميته لصدري مره ثانيه وكنا نواسي بعض بخسارتنا الكبيره
مسكت يده وتوجهنا لهم...
استعدوا للدفن وسمعت اخوانه ينادوني...
قلت لهم اني انا اللي بنزل فالقبر واحطه
ونزل معي واحد من اخوانه يساعدني...
سلمونا اياه من فوق وحطيته وانا ادعي له واذكر الله طول الوقت
كان ودي لو اجلس معه اوحتى اشوفه واسمع صوته لاخر مره
لكن عرفت ان شمسي غابت
خالد ((الرمت)) غاب من حياتي
وهالحياه للابد
اقع لو كان قاسي

04-12-2010, 09:30 PM

[ 9 ]
بعد وفاته
رجعت ذاك الطفل الكتوم المنطوي على نفسه...
انا تركت قلبي معه لما تهاوشنا
ولما راح..
راح قلبي معه
ابتعدت عن الناس والعالم فتره طويله
كنت فاقده بشكل خيالي
واللي يحز في خاطري اكثر
لما اتذكر انه توفى واحنا بعيدين عن بعض
يعني16سنه عمرنا ماتفارقنا
وقبل اقل من شهر على وفاته نتهاوش!!!
اللهم لا اعتراض راضي بقسمتك وحكمك يارب
لكن املي فيه انه كان فاهمني وعارف اني ما اقدر استحمل زعله وقلبي ما يشيل عليه
واني زي ما قال
مهما حاولت آكابر وانساه مصيري ارجع له..
بعد عدة اسابيع على وفاته
عطاني طلال دفتر وقال:
هذا كان من اغراض خالد الله يرحمه واظن ان من حقك تتطلع عليه وتحتفظ فيه بعد اذا ودك
لما شفت الدفتر تذكرته على طول
كنا يوم انا واياه في المكتبه بنشتري كتب للجامعه
وشاف الدفتر وعجبه
وقلت له
هذا مايصلح للمحاضرات ياعمي
قال
عارف بس تدري وش باستخدمه فيه؟! بكتب فيه مذكرات لكن مو أي شي الاحداث المهمه في حياتي بس
اذكر اني ضحكت عليه من قلب
وقلت له
انت من جدك؟!! والله ما تصلح لك هالحركات
ونسيت الموضوع بعد كذا
فتحت الدفتر وكان مكتوب بالصفحه الاولى:
بالرغم من اني اعتقدت ان اليوم الذي ستملئ به هذه الصفحات لن يأتي ابدا, الا انه اتضح لي عكس ذلك.
وعدت يوماً اني لن اكتب به غير احداث مهمة من حياتي ...احداث تستحق الكتابه وقد جاء هذا اليوم بالفعل...فاليوم أخطأت في حق صديق عمري ورفيق طفولتي.
بعد هاذي الكلمات القليله بعددها والكبيره بمعناها في قلبي
لقيت بعض ابيات الشعر:
بندر حرك ضميرك واعترف اني وفيت
سيرة النكران هاذي فضها واذكر غلاي
اعترف بسك تكابر منت واصل ما بغيت
ريح عنادك وخلنا انتفاهم باللي جـــاي
لا تحاول تمتحني ما خذيت؟!الا خذيــت
قلبي الغالي بلاش وما تركت الا شقاي
صح في لعبة غيابك زاد شوقي وابتليـت
بس لاتظلم تراني ما صبرت الابرضاي
ما دريت ان المحبه قاسيه لكن دريت
خطوه المليون جرح وافقت دربي وخطاي
كم تذكرت الليالي وانت يا خلي نسيت
ومن تناسى صدق ذاته ويش اقول الله معاي
يابني آدم تلاحق خاطري لامن طريت
خلك الطيب وحاول تكسب الوقت بوفاي
لا تخليها معاند أن قويت او ما قويت
القوي الله((ياعمي)) وانت تدري عن مداي
وبعد كذا انهى كتاباته بهالبيت:
خسرت ولا ربحت الا قليل من الصبر وجراح
ربحت بندر وان خسرت العمر عسى تحييني اوراقي
وهذا كان اللي مكتوب بكل هالدفتر بس
الدفتر عنده قبل اكثر من اربع سنين وهذا اللي مكتوب فيه
ولاشي اعتبره مهم في حياته الا هوشتنا
ما ادري اذا كان حاس بموته من قبل
والا البيت جا كذا
المهم لميت الدفتر لصدري وقعدت ادعي له
كنت اقعد مع طلال بعض الايام
ومره قال لي ان في آخر سفره لخالد مع اهله
واللي ماراح معهم طلال فيها
قال له:
ماوصيك على بندر ياخوي لا تخليه يحس اني مو موجود خلك حوله دوم..
كمل كلامه وانا ماسك دموعي اللي اتعبتني...
ادري انه مافي شيء يخليك ماتحس انه مو موجود مثل ماقال وما في شيء يعوضك او حتى يعوضنا بس ترانا كلنا حولك حتى ابوي يسأل عنك دايم...
رديت وانا اغالب الدموع
وافكر في حال اهله من بعده...
ماتقصرون...
حاولت اشكي له شوي يمكن اخفف من هالألم الفظيع اللي احس به..
والله انه ماعاد لي قلب ياخالد--..
يوم حسيت اني غلطت بالأسم خلاص انهرت وفضحتني دموعي..
رجعت للبيت
وبعد فتره دخلت ريم علي تحاول تواسيني وتطلعني من دوامه الحزن اللي انا فيها...
بندر يا اخوي كل شوي والله اني خايفه عليك..
كانت جايبه عشاء لكني صديت عن الأكل...
طلبتك ياريم والله ما اشتهي شي...
هزت راسها..
ياخوي فضفض وطلع اللي في قلبك انا اختك وحاسه فيك ما يصير تكتم كل هالالم في قلبك...
رفعت راسي...
وشلون تبيني اتكلم يا ريوم الوحيد اللي قدرت اشكي له في يوم راح وخلاني خالد راح ياريوم وتركني في هالدنيا لحالي...
استغفر ربك يا بندر هالكلام ما يطلع من واحد مثلك انت انسان مؤمن وتعرف الله, وبعدين حرام عليك تضغط على نفسك وتحملها هموم فوق طاقتها تتوقع خالد الله يرحمه يرضى لك بكذا..
امتلت عيوني بالدموع زي كل مره اسمع فيها اسمه
وانا احاول اخفيها عنها..
مسكت يدي..
لا تحاول تخفي دموعك ياخوي طلع اللي في قلبك اللي فقدته مو شوي، انا ياخوي جايه اقول لك ترانا كلنا معاك وحولك في أي وقت تحتاجنا فيه...
ياريم انا شفت الدنيا على يده لكنه ماعلمني اعيشها بدونه، انا خسرت القلب الكبير، من بعده صرت اشوف كل شيء حزين، الدنيا ياريم ماعاد لها طعم بدونه، ليت الزمن يرجع و--
ضغطت ريم على يدي...
لا تعذب روحك ياخوي كلمة ياليت ماتنفع وهذا قدر الله..
ورغم مرور السنوات على وفاته
الا اني عمري ما نسيته اوحتى راح من بالي
عايش داخلي دايم
وادعي له بالرحمه والمغفره كل الأوقات
رحت للعمره
ادور الراحه النفسيه بالقرب من الله
تذكرت وانا اطوف
لما اعتمرت انا والشباب العام الماضي
قسمنا نفسنا عشان الزحمه
كان خالد ماسك يدي و يمشي فيني بين الناس
وانا اقرى من كتاب الادعيه وهو يأمن
ولما رحت اشرب من زمزم تذكرت شكله وهو يصب المويه على راسه وجسمه كنه في بيته
واحنا نقوله ترى وراك سعي ما راح تعرف تمشي واحرامك مليان مويه
و يرد
"واذا صار؟!! والله ماعندكم سالفه هاذي بركه يالله سوو مثلي بلا دلع"
وفي السعي لما شفت العربات تذكرته
لما كنت اجره بالموت عشان ما يوقف وهو يأشر على العربات
"الله يخليك خلنا نقعد شوي خلاص ي ابندر رجلي ما تشيلني خلنا نرتاح شوي والا شرايك نستأجر عربه وانت تدفني؟!"
...وانا اهاوشه على كلامه واجره بالقوه...
خالد تراك اذيتني قسم بالله البزران مايسوون مثلك...
ولما جينا نتحلل كلنا قصرنا شعورنا الا هو حلق شعره كله
كنت دايم في اي عمره اقصر شعري لكن هالمره حلقت..
واخيرا لما رجعت حافي للفندق زي ما كان يسوي خالد
تذكرت لما خليناه ينام على الأرض فالغرفه
وشكله وهو يهمز رجله بعد تعب العمره وهو يتأفف:
ياسلام عليكم بتنوموني على الأرض هالسنه بعد؟؟ ترى ما بيني وبينكم الا شهور، حرام عليكم مو كل مره بندر وسامي ياخذون الأسره في هالغرفه المفروض يصير فيه تناوب!! فالغرفه الثانيه يتناوبون مو انتم يالظالمين...
بس محد عطاه وجه
ولما قام الصبح كان يشتكي من ظهره
وانا اضحك على طريقة مشيته...
امش زين لا تنصب والعمره الجايه انشا الله بتنام عالأرض بعد
رد علي..
هين يا بنيدر ان ما خليتك انت تنام على الأرض انا مب خالد...
سبحان الله
دنيا دواره..
هالسنه اعتمرت لحالي ونمت عالأرض وتركت الأسره فاضيه
ولما قمت الصبح وحسيت ان ظهري يوجعني
ابتسمت بحزن
استقبلت القبله وقعدت ادعي بحراره
ودموعي تنهمر...
يارب اغفر له تراي احبه فيك، ياربي ارحمه و برد علي وامسح على قلبي واجمعني فيه..
كانت هالعمره الله يتقبلها لخالد

04-12-2010, 09:31 PM

[ 10 ]
[ الأخيـــــــر ]
اقترح علي شيخ فاضل من اهلنا
اني احفر له بير في وحده من الدول الأفريقيه الفقيره
واسميه بأسمه الله يرحمه
عشان ارتاح بعد وعلمني عن الأجر الكبير اللي بيجيه ان شالله
وفعلا سويت هالشي
كنت تعبان من جد اشوفه في كل الوجيه
واسمع صوته في كل الاصوات
وذكرى اخر يوم شفته فيها ما تفارقني ابد...
في عيون الناس اشوف اشياء كثيره
بعضهم يذكروني دايم ان خسارتي مو بسيطه
وبعضهم وحشتهم شوفتنا مع بعض
وهذا يتعبني زياده..
واللي يصعب الوضع علي بعد
اني وين ما التفت القى ذكرياته ماليه حياتي
اثاث غرفتي اللي اخترناه سوى لما انتقلنا لبيتنا
سيارتي اللي اختار لونها وساقها قبلي وعطره اللي للحين في درجها!!
ياغلاة اللي راح...
لكن كل ما اتذكر ان ذاك الانسان كان صديقي ورفيقي القريب في يوم من الايام
افرح
وابتسم
واعرف ان الله يحبني
اللي رزقني بأخ مثله
والله يعوض عليه شبابه في الجنه انشالله
واذا كنتم تقدرون تناظرون في عيون ربعكم اليوم وتسمعون حسهم في هالدنيا
احمدوا ربكم على هالنعمه
وحطوهم على راسكم دوم
خاصة الناس اللي يستاهلون صدق
واعرفوا انكم محظوظين
لان غيركم ما يملك ولا بعض اللي عندكم
اما بالنسبه لي
مابعد خالد احد
والله يجمعني فيه بالجنه انشالله...
انا عرضت قصتي على الناس عشان تاخذ منها عبره
وفاته شي مقدر ومكتوب
لكني ابتعدت عنه في اخر شهر له في حياته
بسبب تافه جدا
متخيلين قمة القهر والألم؟!!
هو غلط رحمة الله عليه
وانا عاندت
لكن اللي صار بيننا ما كان يستاهل اللي سوينا
وهذا اللي دايم يسونه الناس
يخسرون احبابهم وربعهم باسباب تافهه
يتركون الشيطان يلعب في عقولهم لين تكبر السالفه
ويفترقون
ولو سألهم احد عن السبب
يلقون ان ما عندهم اجابه واضحه
وهم ما يدرون ان الاشخاص اللي يحبونهم يمكن يروحون فجأة
ياناس انا استنيت لين صار صديقي ذكرى
تبون تستنون مثلي؟؟!!...
فالنهايه
اطلب من كل واحد يقرى قصتي
يدعي لخالد بالرحمه
ويدعي لي ان الله يمسح الحزن اللي عايش فيني كل هالسنين
ونصيحه من قلب ذاق مراره الفراق
"الانسان اللي تحبه وتغليه رح اليوم وقله هالكلام خله يدري لا تستنى يمكن ما تلتقيه بعدين الا مثل مالاقيت خالد, وشي ثاني مهم لا تنتظر انك تفقد انسان غالي عشان تعرف قيمته وقدره عندك"
ختاما...
الى الفقيد الغالي ,
الانسان اللي علمني كيف احب الناس والحياه,
الانسان اللي نسى سعادته عشان يسعد غيره,
صاحب القلب الكبير المليان بحب الخير لكل الناس,
اللي تعلمت منه الكثير وافادني في حياتي ولازلت استفيد,
الانسان اللي كان غير الناس اللي قابلتهم في حياتي
واعرف انه زي ما كان اول صديق بيكون اخرصديق
لان ما في مثله في هالدنيا احد...
"صديقي الوحيد"
خالد العبدالعزيز
الله العالم بحالتي بعدك يالغالي ياليتك هنا عندي،
ما راح انساك يا رفيقي هو في احد يقدر ينسى مثلك؟!
ليتك قبل ما رحت علمتني وين القى انسان زيك!!
متأكد انك تدري اني دايم شاري ما ابيع
وتقبل اسفي البالغ على كل اللي صار مني
...الوداع...
قبل لا انهي القصه
اذا كنت تقرى قصتي وكان بينك وبين من تحبه مشكله وكنتوا بعاد عن بعض
ارسله قصتي وارفقها بأعتذار بسيط
دام عندك فرصه الحين..
**واخالداه**
واخــالداه وضج الجــرح في كبدي
فسرت بالـجرح.. لا انوي على احد
يبكون مــنك_وقد ناحوا_على ولــد
اما انا فبــكائي حرقة ((الرمــــت))
******
يطوف وجــهك في روحي فأســأله
"بالــله!قل لي اهذي فرقة الابــــد؟"
واخــــالده! يغص الشـــعر من الــم
كما تذوب عيون الشوق من ســـــهد
******
ويخطر الموت فوق البيد عاصــفة"
من الدموع...فنادوا الصبر ايا اهلي
غبت في الامس..عل الامس يسعفني
اذا افقت ولم ابـصرك صبح غـد
******
فلحت لي وجدار الــموت منتـــصب
حتى لأوشــك شوقا ان امــد يــدي!!
اين بســـمتك الحسناء؟هل ســــقطت
شمس النهار على ليل من الكمــــــد؟
******
واخــالداه!وعاد الناس..وانصـــرفوا
وانت في القبر..لم تبرح..ولم تـــــعد
تبـــارك اللـه ! نجري كلنا زمـــرا
نحو المنون ولا يبقى سوى الصـــمد
******
تــــــــمــــــت??